00:45 18 აპრილი 2021
პირდაპირი ეთერი
  • EUR4.1187
  • 100 RUB4.5355
  • USD3.4363
საზოგადოება
მოკლე ბმულის მიღება
60 0 0

ჩინურ ვაქცინას ჯანმოს ავტორიზაცია ჯერ არ მიუღია, მაგრამ ბევრი ქვეყანა ამ პრეპარატს უკვე იყენებს ვაქცინაციისთვის.

თბილისი, 9 აპრილი – Sputnik. საქართველოში ჩინური ვაქცინა Sinopharm-ის გამოყენება დაახლოებით 20 აპრილიდან დაიწყება, განუცხადა „პირველ არხს“ დაავადებათა კონტროლის ეროვნული ცენტრის ხელმძღვანელმა ამირან გამყრელიძემ.

მისი თქმით, ჩინურ ვაქცინას ჯანმოს ავტორიზება ჯერ არ მიუღია, მაგრამ დაავადებათა კონტროლის ცენტრი მსჯელობს უკვე მანამდე მისი გამოყენების დაწყების შესახებ. ცნობილია, რომ ტრადიციული მეთოდით დამზადებული ვაქცინა აღიარებულია 40-მდე ქვეყანაში, მათ შორის უნგრეთის მარეგულირებელი ორგანოს მიერ.

„აპრილის მეორე ნახევრიდან, დაახლოებით 20 აპრილიდან დაიწყება ჩინური ვაქცინა Sinopharm-ის გამოყენება და ძირითადად აქცენტი სხვა ასაკებზე და ჯგუფებზე გადავა. არის მოსაზრება, დაველოდოთ ჯანმოს რეკომენდაციას, არის მოსაზრება, რომ ცოტა უფრო ადრე დავიწყოთ, ყოველ შემთხვევაში, დაავადებათა კონტროლის ცენტრს უკვე დაწყებული აქვს მომზადება Sinopharm-ზე“, – განაცხადა გამყრელიძემ.

მისი თქმით, მომავალი კვირიდან შესაბამისი ინსტრუქტაჟი ჩაუტარდებათ იმ კლინიკებს, სადაც Sinopharm-ით ვაქცინაცია დაიწყება. რადგან ჩინური ვაქცინა ჩვეულებრივ ტემპერატურაზე ინახება (+2–+8 გრადუსი) და ერთდოზიან ფლაკონებშია დაფასოებული, კლინიკებში „დიდი გადამზადება საჭირო არ არის“.

გამყრელიძემ აღნიშნა, რომ პარალელურად ინტენსიური მუშაობა მიმდინარეობს ვაქცინების მწარმოებელ სხვა კომპანიებთანაც. კერძოდ, პირდაპირი მოლაპარაკებები ხორციელდება კომპანია Pfaizer-თან, რომელსაც ქვეყანამ დაახლოებით 1 მლნ დოზა შეუკვეთა. ასევე მოლაპარაკება მიდის ინდოეთის „სერუმინის“ ინსტიტუტთან, რომელიც ლიცენზიით ამზადებს ამერიკულ ვაქცინა Novavax-ს. გამყრელიძის თქმით, საქართველომ ამ კომპანიასაც 1 მილიონი დოზა შეუკვეთა.

საქართველოში ჩინური ვაქცინა Sinopharm-ის 100 ათასი დოზა 3 აპრილს ჩამოვიდა. როგორც საქართველოში ჩინეთის ელჩმა განაცხადა, მისი ექსპორტი 50-ზე მეტ ქვეყანაში ხორციელდება. მსოფლიოში უკვე გამოყენებულია 100 მილიონზე მეტი დოზა. ვაქცინის უსაფრთხოება და ეფექტურობა საერთაშორისო საზოგადოების მიერ ფართოდ არის აღიარებული.

ჩინური ვაქცინა ინაქტივირებული (მკვდარი) კორონავირუსის საფუძველზეა შექმნილი. კომპანია Sinopharm-მა ის უჰანის ვირუსოლოგიის ინსტიტუტთან და ბიოლოგიური პროდუქტების ინსტიტუტთან ერთად შეიმუშავა.

ვირუსის ინაქტივაცია ვაქცინის შექმნის ერთ-ერთი ყველაზე ძველი და საიმედო ხერხია, აღნიშნავენ ეპიდემიოლოგები. ამ ტექნოლოგიითაა შემუშავებული, მაგალითად, დიფტერიის, В–ჰეპატიტის, პოლიომიელიტის, ყივანახველასა და სხვა დაავადებების ვაქცინები.

ამჟამად საქართველოში ვაქცინაციისთვის Pfizer-ის და AstraZeneca-ს პრეპარატები გამოიყენება. ბოლო მონაცემებით, ქვეყანაში კორონავირუსის საწინააღმდეგო აცრა 15.693 ადამიანს ჩაუტარდა (ბოლო 24 საათში აიცრა 1.486 ადამიანი).

ვაქცინაციის საერთო ეროვნული გეგმის მიხედვით, ქვეყანაში ვაქცინაცია მედპერსონალით დაიწყო. დაბალი მიმართვიანობის გამო 25 მარტიდან კორონავირუსის საწინააღმდეგო ვაქცინაციის პროცესში 75 წელს ზემოთ და 65-დან 75-წლამდე ასაკობრივი ჯგუფებიც ჩაერთვნენ. ვაქცინაციის მიზნობრივ ჯგუფებს ასევე უკვე დაემატნენ 55 წელს ზემოთ მოქალაქეები, პოლიციელები, სამხედრო მოსამსახურეები, ასევე დიალიზზე მყოფი და ორგანოგადანერგილი პაციენტები. სავარაუდოდ, კორონავირუსის საწინააღმდეგო ვაქცინაციის პროცესში უახლოეს მომავალში მასწავლებლები და განათლების სფეროს სხვა წარმომადგენლებიც ჩაერთვებიან. მაგრამ ვაქცინაციის ტემპები დაბალია.

მთავარი თემები