თბილისი, 28 თებერვალი – Sputnik. წვრთნებისა და სამხედრო განათლების მხარდამჭერი ცენტრი „კრწანისის" ბაზაზე საკონტრაქტო სამხედრო სამსახურის მსურველთათვის საწყისი საბრძოლო მომზადების კურსი (BCT) დაიწყო, იუწყება თავდაცვის სამინისტროს პრესსამსახური.
რვა კვირის განმავლობაში რეკრუტები საცეცხლე, სამედიცინო, სამწყობრო და ტაქტიკურ მომზადებას გაივლიან. მეცადინეობები ჩატარდება ასევე ნავიგაცია-ტოპოგრაფიაში, სადისციპლინო წესდებებსა და ფიზიკურ მომზადებაში. კურსის წარმატებით დასრულების შემდეგ რეკრუტები სამხედრო ფიცს დადებენ და საქართველოს თავდაცვის ძალების სხვადასხვა ქვედანაყოფში გადანაწილდებიან.
„პირველად თავდაცვის ძალების ისტორიაში, გასულ წელს თავდაცვის მინისტრის მიერ მიღებული გადაწყვეტილებით, საწყისი საბრძოლო მომზადების კურსზე (BCT) ჩარიცხული რეკრუტები 500 ლარის ოდენობით ანაზღაურებას იღებენ. კორონავირუსის გავრცელების პრევენციის მიზნით, რეკრუტებს სამხედრო ბაზაზე შესვლამდე სპეციალურად მოწყობილ სამედიცინო სივრცეში ტესტირება, თერმოსკრინინგი და შესაბამისი გამოკითხვა ჩაუტარდათ“, - ნათქვამია თავდაცვის სამინისტროს განცხადებაში.
კურსზე ჩარიცხვამდე რეკრუტებმა გორში, დავით აბრამიშვილის სახელობის თავდაცვის სამინისტროს სამხედრო ჰოსპიტალში ფსიქოლოგიური ტესტები და სამედიცინო შემოწმება გაიარეს.
რეგისტრაციის გავლის შემდეგ საკონტაქტო სამხედრო სამსახურის გავლის მსურველი 150-მდე საქართველოს მოქალაქე შეირჩა.
