თბილისი, 12 თებერვალი – Sputnik. ისრაელის ელჩმა საქართველოში რან გიდორმა იერუსალიმში კორონავირუსზე ვაქცინაციის სრული კურსი ჩაიტარა და მზადაა, დაბრუნდეს თბილისში და თავისი მოვალეობის შესრულებას შეუდგეს. ამის შესახებ დიპლომატმა Facebook–გვერდზე აღნიშნა.
ის თბილისში დაბრუნებას უახლოეს დღეებში გეგმავს.
„დღეს კორონავირუსის ვაქცინის მეორე დოზა გავიკეთე. უმშვენიერეს თბილისში ჩემი დაბრუნების აღსანიშნავად უკეთესი ვერაფერი მოვიფიქრე, გარდა იმისა, რომ დავლიო „სარაჯიშვილის“ საოცარი ბრენდი“, – დაწერა ელჩმა გუშინ.
ისრაელის ელჩი საქართველოში ქვეყნის მოქალაქეებს კარგად ახსოვთ – მან სიმღერა Polo Palace ქართულ ჰიპ–ჰოპ დუეტთან KayaKata ერთად იმღერა და სოციალური ქსელების ქართველი მომხმარებლების პატივისცემა დაიმსახურა. ელჩს მხარი დაუჭირა ახალგაზრდა ქართველმა პიანისტმა, საერთაშორისო კონკურსების ლაურეატმა სანდრო გეგეჭკორმა და ვიდეოს ფორტეპიანოზე დაკვრით შეუერთდა. მცდელობა ნამდვილად ღირდა – ვიდეომ ერთ დღე–ღამეში 26 ათასზე მეტი ნახვა და ქართველების აღფრთოვანებული კომენტარების დაიმსახურა.
გიდორი ელჩად საქართველოში გასული წლის იანვარში დაინიშნა. მან ამ პოსტზე შაბთაი ცური შეცვალა, რომელიც ისრაელის ელჩი საქართველოში რვა წლის განმავლობაში იყო.
დიპლომატიური ურთიერთობები საქართველოსა და ისრაელს შორის 1992 წლის 1 ივნისს დამყარდა. ქვეყნები აწარმოებენ რეგულარულ ორმხრივ და მრავალმხრივ პოლიტიკურ დიალოგს, თანამშრომლობენ საკანონმდებლო სფეროში და ასევე სხვა ბევრ მიმართულებაში.