თბილისი, 8 იანვარი – Sputnik. ხელვაჩაურის მუნიციპალიტეტის სოფელ კაპრეშუმში კიდევ ერთი სოციალური სახლის მშენებლობა დასრულდა, იუწყება „აჭარის ტელევიზია".
ახლადაშენებულ კორპუსში ბინები 39 ეკომიგრანტ ოჯახს გადაეცა. სოციალური სახლის მშენებლობა რეგიონის ხელისუფლებას 3 მლნ ლარამდე დაუჯდა. ხელვაჩაურის მუნიციპალიტეტში 2016 წლიდან დღემდე ეკომიგრანტებისთვის ოთხი სოციალური სახლი აშენდა და ბინა 112 ოჯახს გადაეცა.
ეკომიგრანტებს ახალმოსახლეობა აჭარის მთავრობის მეთაურმა თორნიკე რიჟვაძემ მიულოცა.
„დღეს ხელვაჩაურის მუნიციპალიტეტში 40-მდე ოჯახი ახალმოსახლეობას ზეიმობს. ჩვენ ვაგრძელებთ ეკომიგრანტი ოჯახების ხელშეწყობას და მათი საცხოვრისით უზრუნველყოფას. ბოლო ოთხი წლის განმავლობაში 500-ზე მეტი ოჯახის დაკმაყოფილება მოხდა საცხოვრებელი ფართით, მიმდინარე წელს კი 100-ზე მეტი ოჯახი დაკმაყოფილდება ბინებით“, – განაცხადა რიჟვაძემ.
მისი განმარტებით, მმართველი გუნდისთვის განსაკუთრებით მნიშვნელოვანია სოციალური პოლიტიკა და ეკომიგრანტთა ოჯახების ხელშეწყობა.
ხელვაჩაურის მერიის ინფორმაციით, ამ დროისთვის საცხოვრებელ ფართს მუნიციპალიტეტში 70 ეკომიგრანტი ოჯახი საჭიროებს.
