თბილისი, 17 დეკემბერი — Sputnik. მომღერალ ზურა დოიჯაშვილის დასახმარებლად სატელევიზიო მარათონი გაიმართება, ასევე იგეგმება ფილარმონიის წინ მისი სახელობის ვარსკვლავის გახსნაც. ინფორმაციას სოციალურ ქსელში მომღერალი მერაბ სეფაშვილი ავრცელებს.
მომღერლის თქმით, ღონისძიება კულტურის პალატის ხელმძღვანელის დავით ოქიტაშვილის და მომღერალ ზურა დოიჯაშვილის მეგობრების ორგანიზებით ტარდება, სადაც შეგროვილი თანხით მომღერლის თბილისში ტრანსპორტირება მოხდება.
სეფაშვილი წერს, რომ შესაგროვებელია საჰაერო რეანომობილისთვის საჭირო თანხა – 66 ათასი ლარი (20 000 აშშ დოლარი). მომღერალი მოუწოდებს საზოგადოებას, ნებისმიერ მსურველს, რომელსაც უყვარს ზურა და მისი შემოქმედება, ჩაერთოს ამ საქველმოქმედო აქციაში.
„მარათონი გაიმართება 18 დეკემბერს, დილით, 09:15 საათიდან 10:00 საათამდე საქართველოს საზოგადოებრივი მაუწყებლის პირდაპირ ეთერში. მარათონში მონაწილეობას მიიღებენ ზურა დოიჯაშვილის მეგობრები, მისი კოლეგები. ამავე დღეს თბილისში, ფილარმონიის დიდი საკონცერტო დარბაზის მიმდებარედ გაიხსნება ზურაბ დოიჯაშვილის სახელობის ვარსკვლავი“, – წერს მერაბ სეფაშვილი.
მომღერალი ზურა დოიჯაშვილი რამდენიმე თვეა ისრაელის კლინიკაში აპარატზეა შეერთებული და მძიმე სენს ებრძვის.
მისი ოჯახის წევრები და კოლეგები ცდილობენ, ყველასთვის საყვარელი მომღერალი სამშობლოში დააბრუნონ, რათა სიცოცხლის ბოლო პერიოდი მან მის საყვარელ თბილისში გაატაროს.
ზურა ისრაელში რამდენიმე წლის წინ ოჯახთან ერთად გაემგზავრა ფინანსური პრობლემების გამო. მისი ჯანმრთელობის მდგომარეობა მოულოდნელად დამძიმდა და თბილისში დაბრუნება ვეღარ მოახერხა. ის სამშობლოში სპეციალური თვითმფრინავით უნდა დააბრუნონ, რაც დიდ ხარჯებთან არის დაკავშირებული.