თბილისი, 5 დეკემბერი - Sputnik. „საჩხერის სამედიცინო ცენტრს“ პოლიკლინიკისა და საავადმყოფოს სამედიცინო მომსახურების გაწევისას სხვადასხვა მიმართულებაში უმაღლესი სტანდარტის დაცვისთვის ISO სერტიფიკატი მიენიჭა, იუწყება სამედიცინო დაწესებულება თავის Facebook-გვერდზე.
საუბარია შემდეგ მიმართულებებზე: ქირურგია, პედიატრია, გინეკოლოგია, თერაპია, კარდიოლოგია, კარდიოქირურგია, ჰემოდიალიზი, ანესთეზიოლოგიისა და რეანიმაციის განყოფილებები, ინფექციური დაავადებების მკურნალობა, აგრეთვე ლაბორატორიული და ინსტრუმენტული დიაგნოსტიკის მომსახურება.
აღნიშნული გადაწყვეტილება BSI-ს საერთაშორისო ჯგუფმა მიიღო. შესაბამისად, საჩხერის სამედიცინო ცენტრი საქართველოში ISO სერტიფიკატის მფლობელი პირველი კლინიკა გახდა.
საჩხერის სამედიცინო ცენტრი ერთ-ერთია იმ სამედიცინო დაწესებულებების სიაში, სადაც კორონავირუსით ინფიცირებულ პაციენტებს მკურნალობენ. აღსანიშნავია, რომ კლინიკა პირველივე დღეებიდან არის ჩართული კორონავირუსის წინააღმდეგ ბრძოლაში.
ISO (International Organization for Standardization) სტანდარტიზაციის საერთაშორისო ორგანიზაციას ნიშნავს. ეს არის საერთაშორისო სტანდარტები, რომელიც ორგანიზაციისა და საწარმოს ხარისხის მენეჯმენტის სისტემისადმი მოთხოვნებს აღწერს.
ISO გადაწყვეტილებებს კონსენსუსის საფუძველზე იღებს. ISO-ს სტანდარტები მთელს მსოფლიოშია მიღებული და ხარისხის სინონიმად მიიჩნევა.
