თბილისი, 6 ნოემბერი – Sputnik. თბილისის საქალაქო სასამართლომ დედაქალაქსა და რეგიონებში საოლქო საარჩევნო კომისიებთან გუშინ გამართული საპროტესტო აქციების დროს დაკავებულები დროებით გაათავისუფლა, იუწყება ტელეკომპანია Imedi.
ტელეკომპანიის ცნობით, საოლქო საარჩევნო კომისიებთან აქციების დროს მინიმუმ 12 ადამიანი დააკავეს, მათ შორის – ოპოზიციური პარტია „ერთიანი ნაციონალური მოძრაობის“ წევრი ზვიად კუპრავა. დაკავებულთა სასამართლო პროცესი პარასკევს გაიმართება. გამორიცხული არ არის, რომ სასამართლო საპროტესტო აქციის ფონზე ჩატარდეს.
ოპოზიცია საპარლამენტო არჩევნების შედეგებს არ ცნობს და რამდენიმე დღეა თბილისსა და საქართველოს სხვა ქალაქებში ლოკალურ აქციებს ატარებს საოლქო საარჩევნო კომისიებთან, ხოლო კვირას, 8 ნოემბერს თბილისში მასშტაბურ აქციას აანონსებს.
მმართველ პარტიაში ოპოზიციის ქმედებებს დესტრუქციულს, დესტაბილიზაციისკენ მიმართულს უწოდებენ და აცხადებენ, რომ არჩევნები იყო სამართლიანი და თავისუფალი, რასაც საერთაშორისო სადამკვირვებლო მისიებიც ადასტურებენ.