თბილისი, 2 ნოემბერი – Sputnik. კოვიდ-ინფიცირებულთან მჭიდრო კონტაქტის გამო ეკონომიკისა და მდგრადი განვითარების მინისტრი ნათია თურნავა თვითიზოლაციაში გადავიდა, იუწყება ეკონომიკის სამინისტრო.
„ამ ეტაპისთვის მას არ აღენიშნება COVID-19-სთვის დამახასიათებელი რაიმე სიმპტომი და თავს კარგად გრძნობს“, – ნათქვამია უწყების მიერ გავრცელებულ ინფორმაციაში.
თვითიზოლაციაში იმყოფება საქართველოს პრემიერ-მინისტრი გიორგი გახარიაც, რადგან ახალი კორონავირუსი პრემიერის დაცვის თანამშრომლებს დაუდასტურდათ.
საქართველოში ახალი კორონავირუსით დაავადებულთა რაოდენობა ბოლო დღე-ღამეში 1852-ით გაიზარდა და ინფიცირებულთა საერთო რიცხვმა 42579-ს მიაღწია.
ამ დროისათვის სულ გამოჯანმრთელდა 26 800 ადამიანი გარდაიცვალა 342. კარანტინის რეჟიმშია 2 977, სტაციონარებში ექიმების დაკვირვების ქვეშ 4 293 პაციენტია, ხოლო კოვიდ–სასტუმროებში 2 204 ადამიანი იმყოფება.
საქართველოში კორონავირუსის პირველი შემთხვევა 26 თებერვალს დაფიქსირდა.