თბილისი, 13 ოქტომბერი – Sputnik. საქართველოში ბოლო 24 საათში გამოვლენილი კორონავირუსის 569 ახალი შემთხვევიდან უმეტესობა აჭარასა და თბილისს უკავშირდება, განაცხადა თბილისის ინფექციური საავადმყოფოს ბოქსირებული განყოფილების უფროსმა მარინა ენდელაძემ ჟურნალისტებთან.
აჭარა კორონავირუსის გავრცელების კუთხით „წითელ ზონად“ რჩება. რეგიონში ბოლო დღე-ღამეში ინფიცირების 207 შემთხვევა დაფიქსირდა, გარდაიცვალა ხუთი ადამიანი. პანდემიის დაწყებიდან დღემდე კი აჭარაში კორონავირუსის დიაგნოზით 52 პაციენტია გარდაცვლილი.
რაც შეეხება სხვა რეგიონებს, მაჩვენებლები ასეთია: 168 – თბილისი, 117 – იმერეთი, 25 – შიდა ქართლი, 24 – სამეგრელო–ზემო სვანეთი, 8 – გურია, 7 – ქვემო ქართლი, 5–5 – კახეთი და მცხეთა-მთიანეთი, 3 – სამცხე-ჯავახეთი.
ამ დროისათვის უშუალოდ თბილისის ინფექციურ საავადმყოფოში კორონავირუსის დიაგნოზით 63 პაციენტია მოთავსებული.
როგორც მარინა ენდელაძემ განაცხადა, კორონავირუსით ბოლო 24 საათში გარდაცვლილ ცხრავე პაციენტს თანმხლები დაავადებები აღენიშნებოდა.
ბოლო 24 საათში ქვეყანაში ინიფიცირებულთა რაოდენობა 569-ით გაიზარდა და 12841-ს მიაღწია. ამ დროისათვის სულ გამოჯანმრთელდა 6867 ადამიანი, გარდაიცვალა – 102, კარანტინის რეჟიმში იმყოფება 5590, სტაციონარებში ექიმების დაკვირვების ქვეშ 836 პაციენტია, ხოლო კოვიდ–სასტუმროებში 1393 ადამიანი იმყოფება.
ასევე კორონავირუსის დიაგნოზით უცხოეთიდან სამშობლოში გადმოყვანილია საქართველოს 41 მოქალაქე, მათ შორის 38 – სამხედრო მოსამსახურე.
საქართველოში კორონავირუსის პირველი შემთხვევა 26 თებერვალს დაფიქსირდა.
