თბილისი, 12 ოქტომბერი - Sputnik. საქართველო იქნება აღმოსავლეთ ევროპაში ერთ–ერთი პირველი ქვეყანა, რომელიც მიიღებს დღეისთვის ყველაზე იმედისმომცემ და მოთხოვნად ანტივირუსულ მედიკამენტ „რემდესივირს“, განაცხადა თბილისის ინფექციური საავადმყოფოს გენერალურმა დირექტორმა თენგიზ ცერცვაძემ ჟურნალისტებთან.
როგორც ცერცვაძემ აღნიშნა, ამ ეტაპზე გარანტირებულად იმის თქმა, რომ აღნიშნული მედიკამენტი კორონავირუსთან ბრძოლაში გარანტირებულად ეფექტურია, დამტკიცებული არაა. თუმცა, „რემდესივირის“ გამოყენების შედეგად მოსალოდნელია, რომ კორონავირუსით გარდაცვლილთა რაოდენობა შემცირდება.
„დიდი ალბათობით, ორ-სამ კვირაში საქართველოში ხელმისაწვდომი იქნება დღეისთვის არსებული ორი ყველაზე იმედისმომცემი საშუალება „რემდესივირი“ და მონოკლონური ანტისხეულები. უკვე შემუშავებულია მექანიზმი და სავარაუდოდ, 25-30 ოქტომბრიდან საქართველოში კოვიდ–ინფიცირებულთა მკურნალობაში ჩაერთვება ნომერ პირველი ანტივირუსული მედიკამენტი „რემდესივირი“, – განაცხადა თენგიზ ცერცვაძემ.
თენგიზ ცერცვაძის თქმით, ქვეყანაში ამ ახალი და დღეისთვის ყველაზე იმედისმომცემი მედიკამენტის დროულად შემოტანა საქართველოს მთავრობის ინიციატივითა და ჯანდაცვის სამინისტროს უშუალო მონაწილეობით ხდება.
აღსანიშნავია, რომ ჯანდაცვის მსოფლიო ორგანიზაციის მხრიდან კორონავირუსის წინააღმდეგ პრეპარატების გამოცდების პირველ ფაზაში, რომელიც მარტში დაიწყო, ჩართული იყო „რემდესივირი“, „ჰიდროქსილქლოროქინი“, „ლოპინავირი“ და „რიტონავირი“, მათ შორის „ინტერფერონთან“ ერთადაც. ორგანიზაციის „სოლიდარობის ტესტირებაში“ 4,5 ათასზე მეტი პაციენტი იღებდა მონაწილეობას. ოთხი თვის შემდეგ ჯანმოს ექსპერტებმა განაცხადეს, რომ ჩამოთვლილ პრეპარატებს შორის ყველაზე მეტი ეფექტურობა „რემდესივირმა“ გამოავლინა. დანარჩენი პრეპარატები კი ტესტირებიდან მოიხსნა.
COVID-19-ის მქონე პაციენტებს ესაჭიროებათ ხუთდღიანი კურსი - ექვსი ამპულის გამოყენებით. კურსის საერთო ღირებულება 2340 დოლარს შეადგენს, აღნიშნა ცერცვაძემ.
რაც შეეხება ე.წ. მონოკლონურ ანტისხეულებს, საქართველო მის კლინიკურ გამოცდებში ჩაერთო და ამ ეტაპზე ონლაინ–ტრენინგები მიმდინარეობს.
„საქართველოს მოქალაქეებისთვის ასევე ხელმისაწვდომი გახდება მონოკლონური ანტისხეულებიც, რომლის კვლევაშიც საქართველო მიიღებს მონაწილეობას. საქართველოში რიგითი მოქალაქე უზრუნველყოფილი იქნება ტრამპის სტანდარტით", - განაცხადა ცერცვაძემ.
მონოკლონური ანტისხეულები – იმუნური სისტემის ერთ-ერთი საშუალებაა, ორგანიზმში შეუტიოს უცხო ნივთიერებებს ანტისხეულების გამოყენებით. ამ ანტისხეულების გამოცდა აშშ-ში და მსოფლიოს რამდენიმე წამყვან ქვეყანაში დაიწყო. ამერიკელი მეცნიერ–მედიკოსის, იმუნოლოგისა და ინფექციონისტის ენტონი ფაუჩის პირდაპირი რეკომენდაციით, საქართველო კლინიკური გამოცდების მონაწილე ქვეყნების სიაში მოხვდა.
სექტემბრის დასაწყისიდან საქართველოში მკვეთრად იმატა კორონავირუსით ინფიცირებულთა რაოდენობამ. ბოლო მონაცემებით, ქვეყანაში ინფიცირებულთა რაოდენობამ 12 272–ს მიაღწია, გამოჯანმრთელდა 6 538 ადამიანი, გარდაიცვალა 93.
