თბილისი, 18 აგვისტო – Sputnik. მტკვარში მაშველების მიერ ნაპოვნი გარდაცვლილი ახალგაზრდები ბაია ბერუაშვილი და გიორგი შალამბერიძე გაუჩინარების წინა დღეს თბილისის ერთ-ერთ ცენტრალურ ქუჩაზე შენიშნეს. ინფორმაციას სოციალური ქსელის ერთ-ერთი მომხმარებელი ავრცელებს.
სოციალური ქსელის მომხმარებელი წერს, რომ ახალგაზრდები 14 აგვისტოს, 19:00 საათზე პეკინისა და საბურთალოს ქუჩის კუთხეში ავტომანქანიდან დაინახა, მათ ხელში დიდი პლაკატები ეჭირათ წარწერით „ვაგროვებ სტუდენტურ გადასახადს“.
„ჩემს დაქალს ისიც ვუთხარი – რა საყვარლები არიან, თან ასე რომ აგროვებენ სწავლის ფულს-მეთქი. მათ ბედნიერი, გაბადრული სახეები ჰქონდათ”, – წერს მომხმარებელი.
ბარ „ბაუჰაუსიდან“ გაუჩინარებული ბაია ბერუაშვილის და გიორგი შალამბერიძის ცხედრები საგანგებო სიტუაციების მართვის სამსახურის თანამშრომელმა მდინარე მტკვარში 17 აგვისტოს, ძებნიდან მესამე დღეს იპოვეს.
ორი ადამიანის დაკარგვის შესახებ შეტყობინება პოლიციაში 15 აგვისტოს, 21:00 საათზე შევიდა.
დაკარგვის ფაქტზე აღძრულია სისხლის სამართლის საქმე თავისუფლების უკანონო აღკვეთის მუხლით.
მანამდე ბარის ადმინისტრაციამ თანამშრომლების დაკარგვასთან დაკავშირებით ინფორმაცია სოციალურ ქსელში გაავრცელა.