თბილისი, 7 აპრილი — Sputnik. სოციალურ ქსელში გავრცელდა ინფორმაცია, რომ ქალს, რომელმაც მეუღლე და სამი შვილი ქვიშხეთთან მომხდარ ავარიაში დაკარგა, საზოგადოების დახმარება სჭირდება.
როგორც ქალის მეგობარი წერს, მარიანა აპარატზეა შეერთებული და მის ოჯახს დიდი თანხის გადახდა უწევს ყოველდღიურად.
„ჩვენ ახლა ყველანი ერთად ვიბრძვით და გთხოვთ თუნდაც ერთი ლარით შეეწიოთ ჩვენს ტკბილ გოგოს, თითოეულ თეთრს ძალიან დიდი მნიშვნელობა აქვს ამ ომში. ანგარიშის ნომრები: საქართველოს ბანკი: #GE22BG0000000162482398; TBC ბანკი: #GE37TB7109445064300015; ლიბერთი ბანკი: #GE62LB0211116004056001 მიმღები ეკატერინე ქორიძე“, – წერს ქალი.
26 იანვარს ქვიშხეთში მომხდარი ავარიის დროს ახალგაზრდა მამაკაცი და მისი სამი მცირეწლოვანი ბავშვი დაიღუპნენ. გარდაცვლილები არიან 33 წლის ბაქარ ბანძელაძე და მისი სამი შვილი – ორი ბიჭი და ერთი გოგონა. ბანძელაძის მეუღლე, ბავშვების დედა მძიმე მდგომარეობაში საავადმყოფოში მართვით სუნთქვაზეა და რეანიმაციაში იმყოფება.
ბანძელაძეების ოჯახი ქუთაისიდანაა. ბაქარ ბანძელაძე წლების მანძილზე საზღვარგარეთ მუშაობდა და საქართველოში ცოტა ხნის წინ დაბრუნდა. იმ დღეს ქალიშვილის დაბადების დღე იყო, რომელიც ბაკურიანში აღნიშნეს. საზარელი ავარია სწორედ იმ დროს მოხდა, როდესაც ბანძელაძეები იქიდან ბრუნდებოდნენ.