თბილისი, 4 აპრილი — Sputnik. საქართველოში კორონავირუსით ინფიცირების ბოლო შემთხვევა თურქეთს უკავშირდება, იუწყება პირველი არხი.
ქუთაისის ინფექციურ საავადმყოფოში კორონავირუსი დღეს კიდევ ერთ პაციენტს დაუდასტურდა. კლინიკამ ლაბორატორიიდან შვიდი პაციენტის პასუხი მიიღო, მათგან ექვსი უარყოფითი და ერთი დადებითია.
კლინიკის მთავარი ექიმის, თეიმურაზ ნადირაძის ინფორმაციით, COVID-19-ის ახალი შემთხვევა კარანტინის ზონიდან გადაყვანილი პირია, თურქეთში მოგზაურობის ისტორიით. მისი ჯანმრთელობის მდგომარეობა საშუალო სიმძიმისაა. პაციენტს პნევმონია და მაღალი ტემპერატურა აქვს.
კლინიკაში ახალი კორონავირუსის დიაგნოზით ამ დროისთვის ოთხი მოქალაქეა მოთავსებული, მათგან ერთის ჯანმრთელობის მდგომარეობა მსუბუქი, სამი კი – საშუალო სიმძიმისაა.
საქართველოში ახალი კორონავირუსით ინფიცირებულთა რიცხვმა 156-ს მიაღწია. კარანტინის რეჟიმში იმყოფება 5526 ადამიანი, ხოლო სტაციონარებში დაკვირვების ქვეშ 344 პაციენტია. 28 ადამიანი გამოჯანმრთელდა.
