ჟურნალისტი ნათია ბანძელაძე სოციალურ ქსელში პოსტს აქვეყნებს, სადაც წერს, რომ შობას სასწაულის გარეშე არც მისთვის ჩაუვლია. მაშინ, როცა მისი გარდაცვლილი მეუღლისგან ნიშანს ელოდა, მისმა ქალიშვილმა ნინი გოგიჩაიშვილმა მამა სიზმარში ნახა.
ნათია წერს, რომ მთელი დღე ნერვიულობდა, ბოლოს კი ქალიშვილმა დაურეკა და უთხრა, რომ მამა ესიზმრა.
„ტელეფონი ავიღე და ნინის წერილი მხვდება: „დე მამა დამესიზმრა, ძალიან კარგად იყო და ვერ გავიგე მეუბნებოდა ნათია ნერვიულობსო“. სასწაულების გჯეროდეთ, სიყვარულის გწამდეთ! შობის სასწაულის გარეშე არც მე დავრჩენილვარ! როცა გრძნობ არასდროს მთავრდება“, – წერს ნათია ბანძელაძე.
ჟურნალისტი ნათია ბანძელაძე დეკემბერში სტუმრად იმყოფებოდა ტელეკომპანია „რუსთავი 2“-ის გადაცემა „პროფილში“, სადაც გარდაცვლილ მეუღლეზე ისაუბრა და გაიხსენა, რა რეაქცია ჰქონდათ, როდესაც ამ მძიმე დაავადების შესახებ გაიგეს. პოპულარულ ოჯახში დიდი ტრაგედია ივლისში დატრიალდა. რამდენიმეწლიანი ბრძოლის შემდეგ გიორგი გოგიჩაიშვილის ორგანიზმმა ავადმყოფობას ვეღარ გაუძლო. მისმა გარდაცვალებამ გული მთელ ქვეყანას დასწყვიტა.
მსახიობის კეთილი როლები, ბავშვების უკიდეგანო სიყვარული და გულახდილი ღიმილი ყველას კარგად დაამახსოვრდა. მისი უბოროტო და ყველას მიმართ ყურადღებიანი დამოკიდებულება ბევრისთვის მაგალითად იქცა. გოგიჩას ადამიანები არასდროს დაივიწყებენ, რადგან ის ბავშვობის უდარდელ წლებთანაა დაკავშირებული.
ცნობილი მსახიობი და ტელეწამყვანი გიორგი გოგიჩაიშვილი ივლისში 51 წლის ასაკში გარდაიცვალა. გიორგი გოგიჩაიშვილს, ბავშვებისთვის, მისი პატარა მაყურებლისთვის კი უბრალოდ გოგიჩას 49 წლის ასაკში განსაცდელის პერიოდი დაუდგა. ჯერ საზოგადოებრივ არხზე გადაცემა „ყოჩაღების ქუჩა“ დაუხურეს, შემდეგ კი სრულიად მოულოდნელად გაჩენილ მძიმე სენთან ბრძოლა დასჭირდა. მკურნალობის კურსი უცხოეთში, სტამბულის კლინიკაში ჩაუტარდა. ეს ავადმყოფობა მისი ოჯახისთვის მოწმენდილ ცაზე მეხის გავარდნასავით იყო. მკურნალობის შემდეგ ერთი პერიოდი მსახიობი თავს კარგადაც გრძნობდა, თუმცა ბოლო თვეებში მდგომარეობა გაუარესდა და ის გარდაიცვალა.
