19:45 05 ივნისი 2020
პირდაპირი ეთერი
  • EUR3.3422
  • 100 RUB4.3130
  • USD2.9841
საზოგადოება
მოკლე ბმულის მიღება
44420

„Sputnik–საქართველო“ ადრე უკვე წერდა ქართველ კალიგრაფისტ ნიკა ღუნაშვილზე, რომელმაც ახლა სპეციალურად შექმნა ქართული შრიფტი სტრასბურგში ტრამვაიზე დასატანად.

თბილისი, 28 ნოემბერი — Sputnik. ქალაქ რუსთავის მკვიდრი, 19 წლის სტუდენტი ნიკა ღუნაშვილი ის კალიგრაფისტია, რომელმაც სტილიზებული ქართული შრიფტი შექმნა საფრანგეთში ტრამვაიზე დასატანად. 

გუშინ სტრასბურგის ქუჩებში გამოჩნდა ტრამვაი, რომელსაც ქართული ანბანი ამშვენებს. დიპლომატებმა ასე აღნიშნეს საქართველოს თავმჯდომარედ დანიშვნა ევროპის საბჭოში. ტრამვაი ამ სახით ექვსი თვის განმავლობაში იმოძრავებს ქალაქის ქუჩებში, ანუ სანამ საქართველო ევროპის საბჭოს თავმჯდომარე იქნება. 

როგორც ახალგაზრდა კალიგრაფისტმა განუცხადა „Sputnik–საქართველოს“, მას რამდენიმე თვის წინ დაურეკა საქართველოს საგარეო საქმეთა სამინისტროს წარმომადგენელმა და სთხოვა, შეექმნა ქართული ანბანის ორიგინალური შრიფტი.

ნიკა ამბობს, რომ დღემდე ვერ ხვდება, რატომ ერგო მას ესოდენ დიდი პატივი და არა სხვას.

„რვა წლიდან ვარ დაკავებული კალიგრაფიით. ეს დედაჩემის დამსახურებაა. სწორედ მან მიმიყვანა რუსთავის სკოლა „მთაწმინდელში“, სადაც კალიგრაფიას ასწავლიან. ყველამ არ იცის და ამიტომ ვიტყვი, რომ ამ სკოლაში სწავლა სრულიად უფასოა და ნებისმიერს შეუძლია მივიდეს“, – ამბობს ნიკა ღუნაშვილი.

ნიკა ღუნაშვილი საქართველოს ტექნიკური უნივერსიტეტის სამშენებლო ფაკულტეტის მეორე კურსზე სწავლობს, მთელ თავისუფალ დროს კი კალიგრაფიას უთმობს, რაც დიდ სიამოვნებას ანიჭებს. 

იმის თაობაზე, რომ საფრანგეთის ქალაქში მისი შექმნილი ანბანით მოხატული ტრამვაი ივლის, ნიკა ამბობს: 

„ეს ძალიან სასიამოვნო გრძნობაა, როცა ევროპის ერთ-ერთ ქალაქში ჩემი დახატული ასოები მცირე წვლილს მაინც შეიტანს ქართული კულტურის პოპულარიზაციის საქმეში“.

კალიგრაფისტის თქმით, მისი შრიფტი ასომთავრული ანბანის დეკორატიული სტილის – კიდურყვავილოვანის ბაზაზეა შექმნილი. ეს უძველესი ქართული სტილია, რომელიც პირთა სახელებისა და გვარების დასაწერად გამოიყენებოდა. 

ნიკა ღუნაშვილმა სწორედ ამ დამწერლობის მოტივებზე დაახლოებით ერთ თვეში მოხატა და ორიგინალურად გააფერადა ქართული ანბანის ასოები და სხვა საინტერესო დეტალებითაც შეამკო ისინი. 

აღსანიშნავია, რომ ნიკა ღუნაშვილი არაერთი კალიგრაფიული კონკურსისა და პროექტის გამარჯვებულია. მისი ნამუშევრები მთელი ქვეყნის მასშტაბით ამშვენებს როგორც სარეკლამო ბანერებს, ისე ლიტერატურული გამოცემების აბრებს.

მთავარი თემები