ყველაზე წარმატებული ქართველი კალათბურთელი ზაზა ფაჩულია თაყვანისმცემლებისა და გულშემატკივრების გაოცებას არა მხოლოდ კარიერული მიღწევებით, არამედ დიდი ოჯახითაც ახერხებს. გადატვირთული დღეების მიუხედავად მან შვილებისთვის ახალი ტექნიკა შეიმუშავა და ახლა ამერიკის სპორტ-დარბაზებში პატარა ვაჟებთან ერთად ინტენსიურად ვარჯიშობს. ამის შესახებ ინფორმაციას თავად ზაზა ან მისი მეუღლე თიკა ავალიძე-ფაჩულია ინტერნეტ-სივრცეში აქვეყნებენ.
ზაზა ფაჩულიას ცხოვრებისეული ლოზუნგია Nothing Easy – „მარტივი არაფერია“. ეს სიტყვები მას საკუთარ Instagram-ზე უწერია. ოთხი შვილის მამის კარიერა ბევრი სირთულის თანხლებით ვითარდებოდა. უამრავი დაღვრილი ოფლის სანაცვლოდ ზაზა ფაჩულია დღეს NBA-ს პირველი ქართველი ჩემპიონია, ორგზის ჩემპიონი. მის თითოეულ ნაბიჯს, თამაშსა და ჩემპიონატს ქართველი ქომაგები უაღრესად სერიოზულად აკვირდებიან და გულშემატკივრობენ. თბილისში მისი სახელობის საკალათბურთო სკოლაც დაარსდა, რომელზეც თავად ზრუნავს. აღსანიშნავია, რომ ზაზამ ქართული სოციალური ქსელი არაერთხელ გააერთიანა. მას თანამოაზრეები მალე გამოუჩნდნენ. ზაზას „ჰეშთეგებით“ NBA-ს თამაშებზე გასამარჯვებლად ეხმარებოდნენ და პირად გვერდზე საქართველოს ფაქტობრივად ყველა მოქალაქეს vote for Zaza Pachulia („ხმა მიეცი ზაზა ფაჩულიას“) ეწერა.
35 წლის სპორტსმენს ოთხი შვილი ჰყავს. დათა, საბა, მარიამი და ნუცა სიმაღლითა და სპორტული აღნაგობით მამას ჰგვანან. ბიჭებთან მამას განსაკუთრებული მიდგომა აქვს, როგორც ირკვევა, ისინი ერთად ვარჯიშობენ. მარიამი და ნუცა კი ნამდვილი პრინცესები არიან. აღსანიშნავია, რომ ყველაზე პატარა, ზაზა ფაჩულიას უმცროსი ქალიშვილი ნუცა ამერიკაში დაიბადა. გოგონას გაჩენას მამა არ დასწრებია და მას სახელი უფროსმა დამ შეურჩია.
ზაზა ფაჩულია NBA-ში 2003 წლიდან გამოდიოდა, სადაც თამაშობდა „ორლანდოში“, „მილუოკიში“, „ატლანტაში“, „დალასში“. 2016 წლის ზაფხულში „გოლდენ სტეიტ უორიორზს“ შეუერთდა, სადაც გუნდთან ერთად ორჯერ ზედიზედ საჩემპიონო ბეჭედი მოიპოვა. ზაზა ფაჩულია ამჟამადაც ამ გუნდის წევრია, როგორც ბიზნესის და საკალათბურთო საკითხებში მრჩეველი.
