თბილისი, 24 ოქტომბერი — Sputnik. საქართველოში ბავშვებს ბიზნესის საფუძვლებს მხიარული და გასაგები ფორმით შეასწავლიან – უჩვეულო შემეცნებითი პროექტი „სტარტაპ ანბანი", რომელიც 11-დან 13 წლამდე მოზარდებზეა გათვლილი, თბილისში 2019 წლის ნოემბერში დაიწყება.
პროექტის ინიციატორია კომპანია Impact Hub Tbilisi „ტერაბანკთან" ერთად. კონკურსის საფუძველზე შერჩეულ ტრენინგის მონაწილეებს დაეხმარებიან საკუთარი ბიზნეს-იდეების განვითარებასა და ფინანსური დამოუკიდებლობისკენ პირველი ნაბიჯების გადადგმაში. პროექტში მონაწილეობა უფასოა.
კურსი „სტარტაპ ანბანის" ფარგლებში დაგეგმილია ხუთი სემინარის ჩატარება. მონაწილეობისთვის შეარჩევენ 20 ბავშვს და მათ 10 ჯგუფად დაყოფენ.
ბიზნესში მასტერ-კლასებთან ერთად ბავშვებს ელოდება სამეცნიერო-შემეცნებითი ექსკურსია თბილისის ტექნოპარკში.
პროექტის მონაწილეების ყველაზე საინტერესო და კრეატიული იდეები წარდგენილი იქნება ტრადიციულ საშობაო ბაზრობაზე არტ-ცენტრ Fabrika-ში 21 და 22 დეკემბერს.
პროექტი განხორციელდება 2 ნოემბრიდან 7 დეკემბრის ჩათვლით. მხარდამჭერები არიან ინოვაციებისა და ტექნოლოგიების სააგენტო, კომპანია FabLab Tech Park და მულტიფუნქციური ცენტრი Fabrika. პროექტ „სტარტაპ ანბანის" შესახებ დაწვრილებით იხილეთ ოფიციალურ ვებ-გვერდზე.
