ცნობილი ქართველი მუსიკოსი კახა ცისკარიძე, იგივე კახაბერი რუსული ყვითელი პრესის ყურადღების ცენტრში მოექცა. იქაური მასმედიის ცნობით, კახაბერმა ერთი წლის წინ Comedy Woman-ის მსახიობზე ნატალია ეპრიკიანზე იქორწინა.
გავრცელებული ინფორმაციით, წყვილის ურთიერთობა 2017 წელს დაიწყო, ხოლო საჯაროდ ერთად ერთი წლის წინ ერევანში Comedy Woman-ის ფესტივალზე გამოჩნდნენ.
თუ რუსულ პრესას დავუჯერებთ, ისინი ბათუმში ცხოვრობენ და, უფრო მეტიც, საერთო შვილის მოლოდინში არიან. თავად ნატალიას Instagram-ის გვერდზე კახაბერთან ერთად გადაღებული არაერთი ფოტო უდევს.
ნატალია ეპრიკიანი 1978 წელს თბილისელი სომხების ოჯახში დაიბადა. ის ფიზიკა-მათემატიკურ გიმნაზიაში სწავლობდა, თუმცა 14 წლის ასაკში საქართველოს დატოვება მოუხდა და საცხოვრებლად მოსკოვში გადავიდა.
ეპრიკიანის ოჯახმა რუსეთში იძულებით გადაადგილებული პირის სტატუსი მიიღო. ნატალიამ რუსეთის ეკონომიკური უნივერსიტეტი დაამთავრა და პროფესიით მათემატიკოს-ეკონომისტია.
2006 წელს ნატალიამ იუმორისტული პროექტი Made in Woman შექმნა, რომელიც ТНТ-ს არხზე 2008 წლის 21 ნოემბერს გავიდა და სახელიც შეეცვალა. სწორედ ეთერში გასვლისას ეწოდა პროექტს Comedy Woman. ნატალიას ჰყავს ძმა, რომელიც მუსიკოსია.
რაც შეეხება კახაბერს, ის ცნობილი ქართველი მუსიკოსია, რომელიც ქართულ შოუ-ბიზნესში თავდაპირველად კახუჩელას სახელით გამოჩნდა. წარსულში დაქორწინებული იყო მირანდა ბაქრაძეზე, წყვილს შვილიც ჰყავს, თუმცა, როგორც ჩანს, ოჯახი დაინგრა.