თბილისი, 23 სექტემბერი — Sputnik. კახეთის რეგიონში რთვლის პროცესი სრული დატვირთვით მიმდინარეობს, უკვე 123 ათასი ტონა ყურძენია მოკრეფილი, ნათქვამია ღვინის ეროვნული სააგენტოს განცხადებაში.
მათ შორის ჩაბარებულია 80 ათასი ტონა „რქაწითელი“, 36 ათასი ტონა „საფერავი“, 3 ათასი ტონა „კახური მწვანე“.
დაახლოებით 14 ათასამდე მევენახემ ღვინის სხვადასხვა საწარმოს უკვე ჩააბარა მოსავალი.
რთველის საკოორდინაციო შტაბში აცხადებენ, რომ ყურძნის დღეღამური გადამუშავება კვლავ 10-12 ათასი ტონის ფარგლებში რჩება, რაც რთველის პროცესის აქტიურ ეტაპზე მიუთითებს.
რთველის საკოორდინაციო შტაბი შექმნილია იმისთვის, რომ გადამუშავების ასეთი მაღალი დონის პირობებში ღვინის საწარმოებში რიგები არ წარმოიშვას. შტაბი 24-საათიან რეჟიმში მუშაობს.
დაინტერესებულ პირებს რთველთან დაკავშირებით საჭირო ინფორმაციის მიღება შეუძლიათ გარემოს დაცვისა და სოფლის მეურნეობის სამინისტროს „ცხელ ხაზზე“ – 1501.
სოფლის მეურნეობის სამინისტრო წელს დიდ მოსავალს ელოდება.
გასულ წელს, დამოუკიდებელი საქართველოს ისტორიაში პირველად, რეკორდული რაოდენობის ყურძენი გადამუშავდა – დაახლოებით 230 ათასი ტონა, მევენახეების შემოსავალმა 300 მილიონ ლარს გადააჭარბა.
