ცნობილმა ქართველმა კალათბურთელმა ზაზა ფაჩულიამ აქტიური სპორტული კარიერა დაასრულა. მან NBA-ში მთელი 16 წელი გაატარა და ორჯერ საჩემპიონო ბეჭედიც მოიგო. ზაზა სამუშაოდ „გოლდენ სტეიტში“ დაბრუნდა, სადაც ბიზნესის და საკალათბურთო საკითხებში კონსულტანტი იქნება.
ზაზას მეუღლემ თიკა ალავიძემ „ფეისბუქზე“ პოსტი გამოაქვეყნა, სადაც ზაზას წასვლას ეხმიანება და საქართველოს კალათბურთის ფედერაცია ჰყავს მონიშნული.
„ძალიან დიდხანს ვიკავებდი თავს დამეწერა თუ არა, მაგრამ ამის არდაწერა მომავალი თაობების წინაშე დანაშაულია და მხოლოდ და მხოლოდ ამიტომ ვწერ. როგორ უნდა უთხრათ ახალგაზრდებს ჩამოვიდნენ, ნაკრებში გადადონ თავები წლების განმავლობაში ქართული კალათბურთისთვის, როცა მადლობასაც არავინ გადაუხდის კი არა და ინფორმაციის სახითაც არ დაწერენ არაფერს და ისე გაატარებენ, გეგონება ასობით მოთამაშე გყავდეთ NBA-ში 16 წელი და ვერ იგებდეთ ვინ მიდის და ვინ მოდის! უბრალოდ სირცხცილია და მე შემრცხვებოდა თქვეს ადგილას. შეიძლება თქვენ ამოშალეთ ზაზა, მაგრამ თქვენი პირადი ინტერესები მეათე ხარისხოვანია და მოდი ხალხმა შეაფასოს წლების მერე“, – წერს თიკა ალავიძე.
ფაჩულია და ალავიძე 10 წელია დაქორწინებული არიან. წყვილს ოთხი შვილი ჰყავს.
ზაზა „გოლდენ სტეიტში“ 2016-17 და 2017-18 წლების სეზონში თამაშობდა. ორივეჯერ NBA-ს ჩემპიონის ტიტული მოიგო. გასულ სეზონში კი "დეტროიტის" ღირსებას იცავდა. რაც შეეხება საქართველოს ნაკრებს, ზაზა ნაკრებში 2000 წლიდან 2017-მდე თამაშობდა და ეროვნულ გუნდთან ერთად სამ ევრობასკეტზე იასპარეზა. ამასთან, ცოტა ხნის წინ ზაზა ფაჩულია სწავლას დაუბრუნდა და ჰარვარდის უნივერსიტეტის ბიზნესის-სკოლის სტუდენტი გახდა.
