თბილისი, 31 ივლისი — Sputnik. საქართველოს გამოცდებისა და შეფასების ეროვნულმა ცენტრმა ზოგადი უნარების გამოცდების შედეგები გამოაქვეყნა, რომლის მიხედვით, სტუდენტობის შანსი წელს აბიტურიენტების 12,9%-მა დაკარგა. ამის შესახებ ცენტრის ხელმძღვანელმა სოფიო გორგოძემ ბრიფინგზე განაცხადა.
ბატიაშვილი: აბიტურიენტები აფხაზეთიდან უმაღლეს სასწავლებლებში უგამოცდოდ ჩაირიცხებიან>>
ერთიანი ეროვნული გამოცდები 1-23 ივლისს ჩატარდა. დღეს კი, დაგეგმილზე ერთი დღით ადრე ზოგადი უნარების გამოცდების შედეგები გამოქვეყნდა.
„დანარჩენი საგნების შედეგები შემდეგი კვირის ბოლომდე, ეტაპობრივად გამოქვეყნდება. ხოლო შედეგების გამოქვეყნების შემდეგ დაიწყება აპელაციის პროცესი", – განაცხადა გორგოძემ.
ზოგადი უნარების გამოცდის შედეგების გასაცნობად საჭიროა ცენტრის ვებ-გვერდზე შესვლა naec.ge და აბიტურიენტის პირადი მონაცემების – პირადობის მოწმობის ნომრისა და აბიტურიენტის საგამოცდო ნომრის შეყვანა.
გამოცდის შედეგებთან ერთად შესაძლებელია აბიტურიენტების ნამუშევრების ნახვაც.
ინფორმაციის მიღება შესაძლებელია ტელეფონითაც. ამისთვის საგამოცდო კოდი უნდა გაგზავნოთ ნომერზე 93333. SMS-შეტყობინება 0,5 ლარი ღირს.
მინიმალური გამსვლელი ქულა ზოგადი უნარების გამოცდის I და III ვარიანტებში იყო 22 ქულა, ხოლო II და IV ვარიანტებში – 24 ქულა.
წელს ერთიან ეროვნულ გამოცდებზე დაახლოებით 41 ათასი აბიტურიენტი დარეგისტრირდა.
წელს აბიტურიენტებმა კვლავ ოთხი გამოცდა ჩააბარეს. აქედან სამი – ქართული ენა და ლიტერატურა, ზოგადი უნარები და უცხო ენა სავალდებულო იყო, ხოლო ერთი საგანი არჩევითი – ლიტერატურა, მათემატიკა, ისტორია, გეოგრაფია, ქიმია, ფიზიკა, ბიოლოგია, სახვითი და გამოყენებითი ხელოვნება ან სამოქალაქო განათლება.
