მომღერალ თიკა ჯამბურიას დაკავებას მცირეწლოვან შვილთან ერთად, სოციალურ ქსელში საზოგადოების ცნობილი სახეები აპროტესტებენ. ფაქტი საქართველოს ყოფილმა პირველმა ლედიმ, მაკა ჩიჩუამ გააპროტესტა.
„ეს რა არის?! ასეთი ისტორიას არ ახსოვს“, - წერს გიორგი მარგველაშვილის მეუღლე.
„შვილს რატომ აყურებინეთ ეს მარაზმი. პატრულის მანქანაში რატომ ჩასვით ბავშვი! გაგიჟდით მგონი“, -წერს ტელეწამყვანი ნანუკა ჟორჟოლიანი, რომელმაც ცოტა ხნის შემდეგ დაწერა, რომ ამ პოსტის გამო კრიტიკა დაიმსახურა „ჯამბურია ქოცია და რატო იცავო. მგონი ყველა უნდა ამოვწყდეთ და ეგაა შველა“, - წერს ტელეწამყვანი.
„არასწორი პარკირებისთვის საკუთარ სახლთან დააკავეს მომ ღერალი თიკა ჯამბურია 8 წლის შვილის თვალწინ, ბორკილები დაადეს და წაიყვანეს! ვაი თქვენს პატრონს, ახი ყოფილა თქვენზე ის პაგონების გლეჯვაც, დედის გინებაც და აქციებზე რომ გიტრიალებენ ნარკომანები მკვდარ-ცოცხალს! ისინი არ დააკავოთ არა, თქვენს მხარდამჭერებს მიდექით, წინ წახვალთ!“, - წერს ჟურნალისტი ნინო ჯღარკავა.
თიკა ჯამბურია დედასთან დ შვილთან ერთად თავისუფლების მოედანთან 25 ივლისს დააკავეს. მას ბრალად არასწორად პარკირებული ავტომანქანის გამო სამართალდამცავებთან წინააღმდეგობის გაწევა ედება. მომღერალი ხელწერილის საფუძველზე რამდენიმე საათში გაათავისუფლეს.
