თბილისი, 7 მაისი — Sputnik. მეორე მსოფლიო ომში დაღუპულთა ხსოვნის პატივსაცემად „უკვდავი პოლკის" აქცია 9 მაისს საქართველოს რამდენიმე ქალაქში ჩატარდება. „უკვდავი პოლკი" ქვეყანაში მესამედ გაიმართება და მოიცავს თბილისს, ბათუმს, გორს, ახალქალაქსა და ნინოწმინდას.
თბილისში „უკვდავი პოლკის" აქციის გასამართად ორი ადგილია შერჩეული. 10:00 საათზე მისი მონაწილეები გამარჯვების პარკის ცენტრალურ შესასვლელთან შეიკრიბებიან და მარადიული ცეცხლისკენ გაემართებიან, რომელსაც გვირგვინებითა და ყვავილებით შეამკობენ. „უკვდავი პოლკის" მსვლელობა გაიმართება ჭავჭავაძის გამზირზეც, რომლის მონაწილეები 9 მაისს, 10:00 საათზე კუს ტბის ასახვევთან შეიკრიბებიან.
ბათუმში აქცია თავისუფლების მოედანზე 11:00 საათზე, გორში კი 10:00 საათზე სტალინის სახლ-მუზეუმთან გაიმართება. ახალქალაქში აქციის მონაწილეები მუნიციპალიტეტის შენობასთან შეიკრიბებიან და თავისუფლების ქუჩიდან ვაჩაგან ვანცინიანის ძეგლამდე ჩაივლიან. ნინოწმინდაში აქცია გამგეობის შენობასთან 11:00 საათზეა დაგეგმილი.
მოძრაობა „უკვდავი პოლკი" არის შესაძლებლობა იმის ჩვენებისა, რომ გამარჯვებულთა შთამომავლობა არასდროს დაივიწყებს წინაპრების გმირობასა და გამარჯვების მნიშვნელობას. მარში ტრადიციულად 9 მაისს რუსეთში, ესტონეთში, ბელარუსში, მოლდავეთსა და სხვა სახელმწიფოებში იმართება.
