თბილისი, 30 აპრილი - Sputnik. საქართველოში ქალების რიცხოვნობა 2019 წლის 1 იანვრის მდგომარეობით, 0,3 პროცენტით შემცირდა და 1 932,6 ათასით განისაზღვრა, იუწყება ტელეკომპანია Imedi სტატისტიკის ეროვნულ სამსახუზე დაყრდნობით.
მამაკაცების რიცხოვნობა კი წინა წელთან შედარებით პრაქტიკულად უცვლელი დარჩა და 2019 წლის 1 იანვრის მდგომარეობით ამ მაჩვენებელმა 1 790,9 ათასი შეადგინა.
წინა წელთან შედარებით 0,2 პროცენტით შემცირდა საქართველოს მოსახლეობის რიცხოვნებაც და 2019 წლის 1 იანვრის მდგომარეობით მისმა რაოდენობამ 3 723,5 ათასი კაცი შეადგინა.
საქართველოს მოსახლეობის 48% მამაკაცი, ხოლო 52% – ქალია.
2019 წლის 1 იანვრის მდგომარეობით, საქართველოში სქესთა რაოდენობრივი თანაფარდობის მაჩვენებელი 92,7-ს წარმოადგენდა, რაც იმას ნიშნავს, რომ ყოველ 100 ქალზე 92,7 მამაკაცი მოდიოდა.
„საქსტატის“ ცნობით, 35 წლამდე ასაკში მამაკაცები ჭარბობდნენ ქალებს, ხოლო 35 წლის ასაკიდან ქალების რიცხოვნობა აღემატებოდა მამაკაცებისას, რაც გამოწვეულია მამაკაცებთან შედარებით ქალების უფრო მაღალი სიცოცხლის მოსალოდნელი ხანგრძლივობით.
საქართველოში აბორტების რიცხვი შემცირდა >>
2018 წელს სიცოცხლის მოსალოდნელი ხანგრძლივობა დაბადებისას შეადგენდა 74 წელს, მათ შორის მამაკაცებისათვის 69,7 წელს, ხოლო ქალებისათვის - 78,2 წელს. 2019 წლის 1 იანვრის მდგომარეობით, საქართველოს მოსახლეობის მედიანური ასაკი 37 წელია (ანუ ასაკი, რომელთან შედარებითაც ქვეყნის მოსახლეობის ერთი ნახევარი უფროსია, მეორე ნახევარი კი - უმცროსი).
