თბილისი, 10 დეკემბერი — Sputnik. „Sputnik-საქართველოს" მკითხველთა უმრავლესობა დარწმუნებულია, რომ მისი ავტომობილი ტექნიკურ დათვალიერებას გაივლის, ამაზე მეტყველებს ახალი ამბების ვებ-გვერდზე ჩატარებული გამოკითხვის შედეგები.
კითხვაზე „გაივლის თუ არა თქვენი ავტომობილი ტექდათვალიერებას", გამოკითხვაში მონაწილეთა 56%-მა უპასუხა, რომ გაივლის.
მკითხველთა 8 პროცენტს მიაჩნია, რომ მისი ავტომობილი ტექდათვალიერებას ვერ გაივლის, ხოლო 16%-მა – არ იცის. 20%-მა აღნიშნა, რომ ავტომობილი არ ჰყავს.
პირველ ეტაპზე, 2018 წლის 1 იანვრიდან ტექდათვალიერება სავალდებულო იყო სამგზავრო (8 ადგილზე მეტი) და სატვირთო (3,5 ტონის ზემოთ) ავტომობილებისთვის.
1 ივლისიდან ტექნიკური ინსპექტირების მეორე ეტაპი დაიწყო. შემოწმებას დაექვემდებარა სახელმწიფო უწყებებისა და იურიდიული პირების კუთვნილი ავტოსატრანსპორტო საშუალებები.
მიმდინარე წლის ოქტომბრიდან კი მესამე ეტაპი დაიწყო – სავალდებულო ტექნიკურ შემოწმებას დაექვემდებარა დიდი მოცულობის ძრავის (3,0 და მეტი) მქონე ავტომობილები.
სად გაქრა უკანა სავარძლები თბილისის სამარშრუტო ტაქსებში>>
2019 წლის 1 იანვრიდან ტექნიკურ ინსპექტირებას საქართველოში რეგისტრირებული ყველა მსუბუქი ავტომანქანა გაივლის.