თბილისი, 20 აგვისტო — Sputnik. ქუთაისის აეროპორტში ავიარეისი მენინგემი-ქუთაისი, რომელიც გუშინ ავიაკომპანია „wizz air“-ს უნდა შეესრულებინა, გაუქმდა, იუწყება ტელეარხი Imedi.
აეროპორტის ადმინისტრციის ინფორმაციით, რეისის გაუქმება ამინდის გაუარესებამ გამოიწვია.
ამასთან, ქუთაისი-მენინგემის რეისი, რომელიც გუშინ ქუთაისიდან გაფრინდა 19:17 საათზე, მენინგემში არსებული ძლიერი ელჭექის გამო მიუნხენში დაფრინდა.
გაუქმებული რეისის მგზავრთა საყურადღებოდ ქუთაისის საერთაშორისო აეროპორტი ინფორმაციას ავრცელებს.
"მენინგემიდან მომავალ მგზავრებს, ავიაკომპანია ალტერნატიულ მარშრუტებს შესთავაზებს. იმ შემთხვევაში თუ ვერ ახერხებთ wizz air-ის საინფორმაციო ცენტრთან დაკავშირებას და თავად ავიაკომპანია ამ დრომდე არ დაგკავშირებიათ, ინფორმაციისათვის შეგიძლიათ დარეკოთ შემდეგ ნომრებზე: 069120066954 (გერმანული ნომრიდან)
+4969120066954; +44330977044. აქვე მიიღებთ ინფორმაციას ხარჯების ანაზღაურების შესახებ", — აცხადებენ ქუთაისის აეროპორტში.
ქუთაისის საერთაშორისო აეროპორტი საქართველოში პოპულარობით მეორე აეროპორტია, საიდანაც მსოფლიოს სხვადასხვა მიმართულებით რეისებს ლოუკოსტერი კომპანიები ახორციელებენ. 2017 წლის ექვს თვეში ის დაახლოებით 185 ათას მგზავრს მოემსახურა.