თბილისი, 14 მაისი – Sputnik. რუსეთის პრეზიდენტმა ვლადიმირ პუტინმა და სომხეთის პრემიერ-მინისტრის მოვალეობის შემსრულებელმა ნიკოლ ფაშინიანმა სატელეფონო საუბრისას სომხეთი–აზერბაიჯანის საზღვარზე, სიუნიკში მომხდარი ინციდენტი განიხილეს, იუწყება კრემლის პრეს-სამსახური.
საუბარი სომხეთის მხარის ინიციატივით შედგა.
„ვლადიმირ პუტინმა აქცენტი გააკეთა რუსეთის, სომხეთისა და აზერბაიჯანის ლიდერების 2020 წლის 9 ნოემბრისა და მიმდინარე წლის 11 იანვრის განცხადებების ყველა დებულების განუხრელად შესრულებაზე, უპირველეს ყოვლისა, ცეცხლის შეწყვეტის რეჟიმის უპირობოდ დაცვის ნაწილში“, – ნათქვამია განცხადებაში.
რუსეთის პრეზიდენტმა დაადასტურა, რომ მზადაა გააგრძელოს შუამავლის როლის შესრულება ერევანსა და ბაქოს შორის.
ნიკოლ ფაშინიანმა, თავის მხრივ, მხარი დაუჭირა სამხრეთ კავკასიაში ყველა პრობლემის მხოლოდ მშვიდობიანი პოლიტიკურ-დიპლომატიური გზით მოგვარებას.
როგორც განცხადებაშია აღნიშნული, შეხვედრაზე მხარეებმა სამხრეთ კავკასიაში ეკონომიკურ და სატრანსპორტო-ლოჯისტიკური კავშირების აღდგენის საკითხზეც ისაუბრეს.
სომხეთის თავდაცვის სამინისტრომ გუშინ განაცხადა, რომ აზერბაიჯანის შეიარაღებულმა ძალებმა სცადეს გარკვეული ღონისძიებების გატარება „საზღვრების დასაზუსტებლად“ სიუნიკის ოლქის ერთ-ერთ სასაზღვრო მონაკვეთზე. ამასთან, უწყებაში არ დაუზუსტებიათ, კონკრეტულად რა სამუშაოები ჩაატარეს აზერბაიჯანელმა სამხედროებმა. ერევანი ამ ინციდენტს დაგეგმილ პროვოკაციად აფასებს. სომხეთის პროკურატურამ ტერიტორიული მთლიანობის დარღვევის ფაქტზე სისხლის სამართლის საქმე აღძრა.
