თბილისი, 13 იანვარი – Sputnik. საქართველოში ოპოზიცია განაგრძობს ვერსიებზე საუბარს მილიარდერისა და მმართველი პარტია „ქართული ოცნების“ დამფუძნებლის ბიძინა ივანიშვილის პოლიტიკიდან წასვლის ირგვლივ.
ივანიშვილმა პოლიტიკიდან წასვლის შესახებ მოულოდნელი განცხადება ორშაბათს, საპარლამენტო არჩევნების შემდეგ ოპოზიციის პროტესტის შედეგად შექმნილი პოლიტიკური კრიზისისა და პანდემიით გამოწვეული ეკონომიკური ვარდნის ფონზე გააკეთა.
„ჩვენ არ ვიცით, რეალურად წავიდა ივანიშვილი თუ ფიქტიურად“, – განუცხადა ჟურნალისტებს „სტრატეგია აღმაშენებლის“ ერთ-ერთმა ლიდერმა სერგო ჩიხლაძემ.
ის ვარაუდლბს, რომ თავისი გადაწყვეტილებით ივანიშვილი „ცდილობს გაემიჯნოს წარუმატებელ „ქართულ ოცნებას“, აქტივების საქველმოქმედო ფონდისთვის გადაცემა კი ჩამოჰგავს „ქონების გადადებას მარჯვენა ჯიბიდან მარცხენა ჯიბეში“.
„ევროპულ საქართველოში“ ივანიშვილის წასვლას განმარტავენ, როგორც მარცხის აღიარებას.
„კომფორტის ზონაში წავიდა ივანიშვილი თუ ლეთარგიულ ძილში, ფაქტია, რომ მას მოუხდა უკან დახევა, როდესაც ქვეყანაში არსებული პრობლემები გააცნობიერა“, – განაცხადა „ევროპული საქართველოს“ ერთ-ერთმა ლიდერმა გიგი უგულავამ.
მისი შეფასებით, ივანიშვილის გადაწყვეტილება გავლენას მოახდენს ოპოზიციის გეგმებზე და „ქვეყანას რიგგარეშე არჩევნებს მიუახლოებს“.
„ივანიშვილმა, როგორც ადამიანმა, რომელიც მუდმივად თავის ქონებაზე ფიქრობს, გადაწყვიტა არჩევანი გაეკეთებინა საკუთარი ქონების სასარგებლოდ – სიღრმეში წავიდა... ის მოქმედებს თვითგადარჩენის ინსტინქტით“, – განაცხადა უგულავამ, თუმცა არ გამორიცხა, რომ ივანიშვილი ინტროვერტია და მას სიამოვნებას არ ანიჭებდა საჯარო საქმიანობა ბოლო წლების განმავლობაში.
„ერთიანი საქართველოს“ ლიდერი ნინო ბურჯანაძე აცხადებს, რომ არ სჯერა ივანიშვილის ქველმოქმედების.
„ეს ჰგავს ქონების დაცვის მცდელობას, რათა პოლიტიკური კრიზისის პერიოდში მას არაფერი დაემუქროს. მეორე მხრივ, ეს, შესაძლოა, არის გადასახადებისთვის თავის არიდების სურვილი, რომელიც შეიძლება დაეკისროს, ვინაიდან ეს ქონება ახლა მომგებიანი არ არის“, – განაცხადა ბურჯანაძემ.
„ესაა პირდაპირი აღიარება იმისა, რომ ივანიშვილმა და მისმა პოლიტიკურმა პროექტმა „ქართული ოცნების“ სახით განიცადა სრული ფიასკო“, – მიაჩნია „ნაციონალური მოძრაობის“ ერთ-ერთ ლიდერს სალომე სამადაშვილს.
„წელს ჩვენ მკაფიოდ დავინახავთ საქართველოს ეკონომიკის კრახს... წინ გველის უმძიმესი ეკონომიკური, სოციალური კრიზისი და ნათელია, რომ ეს გუნდი ვერაფერს ვერ გაუმკლავდება“, – განაცხადა სამადაშვილმა.
მას ასევე არ სჯერა, რომ ივანიშვილი არაფორმალურ გავლენას დათმობს.
ექს-პრეზიდენტ მიხეილ სააკაშვილის განცხადებით კი, ივანიშვილმა საქართველოს უბედურებაზე ხუთი მილიარდი დოლარი იშოვა და ქვეყანა დააპაუზა, შეაჩერა ეკონომიკური ზრდა და „ჯიბეში ჩაიდო“ წაგებული საპარლამენტო არჩევნები.
ბიძინა ივანიშვილი: მე არც „ქართული ოცნების“ მხარდამჭერი ვიქნები>>
„მას ნამდვილად მოუწევს წასვლა და ხელისუფლების გადაბარება... მას მოუწევს ხელისუფლების გადაბარება ოპოზიციური კოალიციისთვის“, – განაცხადა სააკაშვილმა ვიდეომიმართვაში.
ივანიშვილის გადაწყვეტილება მან ახსნა აშშ-ში განვითარებული მოვლენებით და ტრამპის მარცხით. „TV პირველისთვის“ მიცემულ ინტერვიუში სააკაშვილმა განაცხადა, რომ სწორედ ივანიშვილი აფინანსებდა ტრამპის კამპანიას ლობისტების ჯგუფის დახმარებით და „ახლა ძალიან შეშინებულია“. „მან იცის, რომ ფეხქვეშ მიწა ეწვის“, – განაცხადა სააკაშვილმა.
იგი ამტკიცებს, რომ „რამდენიმე თვის წინ ივანიშვილთან იმყოფებოდა ამერიკის ელჩი და მაშინ ერთ-ერთ პირობად წამოყენებული იყო ივანიშვილის წასვლა პოლიტიკიდან“.
თავად ივანიშვილი აცხადებს, რომ საქართველოს „საიმედო ხელში“ ტოვებს და ენდობა „ქართული ოცნების“ პოლიტიკურ გუნდს, რომელსაც თავისი წასვლისთვის რამდენიმე თვე ამზადებდა.
„მე ვუბრუნდები ცხოვრების წესს, რომელიც ადრე მქონდა და რომელიც ძალიან მომწონს“, – განაცხადა მმართველი პარტიის დამფუძნებელმა ქართული ტელევიზიისთვის მიცემულ ბოლო ინტერვიუში.
2011 წელს პოლიტიკაში მოსვლამდე ბიძინა ივანიშვილი საქართველოში ერთ-ერთი ყველაზე იდუმალებით მოცული ადამიანი იყო. იგი ოჯახთან ერთად კარჩაკეტილ ცხოვრებას ეწეოდა, იშვიათად ჩნდებოდა საზოგადოებაში და არასდროს იძლეოდა ინტერვიუს. უპირატესობას ანიჭებდა მშობლიურ სოფელ ჭორვილაში ცხოვრებას. მაშინ ერთადერთი, რაც ივანიშვილზე იყო ცნობილი, ის იყო, რომ იგი საქართველოს უმდიდრესი ადამიანი იყო და დიდ ფულს ხარჯავდა ქველმოქმედებაზე. მისი გადაწყვეტილება, მოსულიყო პოლიტიკაში, მოულოდნელი აღმოჩნდა, მაგრამ უკვე 2012 წელს მილიარდერის მიერ შექმნილმა პარტია „ქართულმა ოცნებამ“ საპარლამენტო არჩევნები მოიგო და „ერთიან ნაციონალურ მოძრაობას“ ქვეყნის მართვის სადავეები ჩამოართვა.
ჩრდილში მიდის – ივანიშვილმა პოლიტიკოსის რანგში პირველ არხს „ბოლო“ ინტერვიუ მისცა>>
ივანიშვილი პოლიტიკიდან ერთხელ უკვე წავიდა საპრეზიდენტო არჩევნების შემდეგ, რომელიც „ოცნების“ კანდიდატმა გიორგი მარგველაშვილმა მოიგო, მაგრამ შემდეგ კვლავ დაბრუნდა პარტიის თავმჯდომარის პოსტზე. ბოლო განცხადებებში მან განმარტა, რომ მაშინ „ოცნება“ დაშლის პირას იყო, მაგრამ ამჟამად მისი პოლიტიკიდან წასვლის გადაწყვეტილება საბოლოოა და გადახედვას არ ექვემდებარება.
ამჯერად წასვლის შესახებ გამოცხადებისას ივანიშვილმა თავისი აქტივების დიდი ნაწილი – 1,5 მილიარდი დოლარი თავისივე საქველმოქმედო ფონდ „ქართუს“ გადასცა, მანამდე კი, 2020 წლის ბოლოს, თბილისს ყოფილი იპოდრომის ტერიტორია აჩუქა ცენტრალური პარკის მოსაწყობად.
