თბილისი, 17 მაისი — Sputnik. ღამის საათებში გადაადგილებაზე დაწესებული შეზღუდვა უწყებათშორის საკოორდინაციო საბჭოზე გადაიხედება, განაცხადა პრემიერ-მინისტრმა ირაკლი ღარიბაშვილმა ორშაბათს გამართულ მთავრობის სხდომაზე.
ამჟამად ქვეყანაში როგორც დახურულ, ისე ღია სივრცეში პირბადის ტარება სავალდებულოა, 21:00–05:00 საათებში მოქმედებს ე.წ. „კომენდანტის საათი“.
„ბევრისგან საყვედური გვესმის, რომ „კომენდანტის საათი“ აღიზიანებთ. ჩვენ აღნიშნულ საკითხს განვიხილავთ და შესაბამის გადაწყვეტილებას მივიღებთ იმის გათვალისწინებით, თუ რა რეკომენდაციები ექნება ჯანდაცვის სამინისტროს“, – განაცხადა ღარიბაშვილმა.
როგორც პრემიერმა განმარტა, ზაფხულის დადგომასთან ერთად საქართველოში ტურისტების ნაკადი იზრდება და მნიშვნელოვანია, რომ ხელისუფლებამ ეპიდვითარების ეფექტურად მართვა შეძლოს.
