თბილისი, 16 მარტი – Sputnik. საქართველოს პარლამენტმა განათლების, მეცნიერების, კულტურისა და სპორტის სამინისტროს ორ უწყებად გაყოფის გადაწყვეტილებას მხარი დაუჭირა, იუწყება „პირველი არხი“.
მთავრობის სტრუქტურაში ცვლილებებს პარლამენტში მესამე მოსმენით უყარეს კენჭი. პარლამენტმა 79 ხმით არც ერთის წინააღმდეგ მხარი დაუჭირა საკანონმდებლო ცვლილებათა პაკეტს „საქართველოს მთავრობის სტრუქტურის, უფლებამოსილებისა და საქმიანობის წესის შესახებ“ კანონში ცვლილების შეტანის თაობაზე.
მთავრობის მიერ ინიცირებული პროექტის მიხედვით, განათლების, მეცნიერების, კულტურისა და სპორტის სამინისტრო იყოფა ორ სამთავრობო უწყებად – განათლებისა და მეცნიერების სამინისტროდ და კულტურის, სპორტისა და ახალგაზრდობის სამინისტროდ.
კანონის საბოლოოდ ძალაში შესვლის შემდეგ საქართველოს მთავრობამ 10 დღის ვადაში განათლების, მეცნიერების, კულტურისა და სპორტის სამინისტროს ბალანსი და ბიუჯეტი ორ უწყებას შორის უნდა გადაანაწილოს.
არსებული ინფორმაციით, კულტურის, სპორტისა და ახალგაზრდობის მინისტრის თანამდებობას თეა წულუკიანი დაიკავებს, ხოლო განათლებისა და მეცნიერების მინისტრის პოსტს მიხეილ ჩხენკელი შეინარჩუნებს.
საქართველოს პარლამენტმა ასევე მიიღო ცვლილებები რეგლამენტში, რომლის შედეგადაც საქართველოს პარლამენტში განათლების, მეცნიერებისა და კულტურის კომიტეტის ნაცვლად განათლებისა და მეცნიერების კომიტეტი და კულტურის კომიტეტი შეიქმნა.
ორი სამინისტრო 2018 წელს, მამუკა ბახტაძის პრემიერ-მინისტრობის დროს გაერთიანდა სტრუქტურული რეფორმის ფარგლებში, რომლის შემდეგ 14-დან 10 სამინისტრო და ერთი სახელმწიფო მინისტრის აპარატი დარჩა.
