თბილისი, 20 თებერვალი – Sputnik. საპარლამენტო კომიტეტებში საქართველოს განახლებული მთავრობის შემადგენლობის ნდობის გამოცხადების საკითხის განხილვა დაიწყო.
„ევროპელი სოციალისტები“ ღარიბაშვილის კანდიდატურას მხარს არ დაუჭერენ >>
ახალი მინისტრთა კაბინეტი პარასკევს წარადგინა პრემიერობის კანდიდატმა ირაკლი ღარიბაშვილმა, რომელიც ამ პოსტზე მმართველმა პარტიამ „ქართული ოცნება - დემოკრატიულმა საქართველომ“ წამოაყენა.
დღეიდან მთავრობის მიმართ ნდობის გამოცხადების საკითხს, ასევე 2021-2024 წლების სამთავრობო პროგრამას „ევროპული სახელმწიფოს მშენებლობისთვის“ განიხილავენ საქართველოს პარლამენტის კომიტეტებში, ფრაქციებში და ოპოზიციურ ჯგუფებში.
ამ წუთებში საკითხი განიხილება ეკონომიკური სექტორის ოთხი კომიტეტის ერთობლივ სხდომაზე. მოგვიანებით, 15:00 საათზე დაგეგმილია დიასპორისა და კავკასიის საკითხთა კომიტეტის, საგარეო ურთიერთობათა კომიტეტისა და ევროპასთან ინტეგრაციის კომიტეტის ერთობლივი სხდომა. სხდომას სპიკერად გაუძღვება საგარეო საქმეთა მინისტრობის კანდიდატი დავით ზალკალიანი.
საქართველოს მთავრობის მეთაურის სავარძელი მას შემდეგ გათავისუფლდა, რაც ხუთშაბათს გიორგი გახარიამ გადადგომის შესახებ განცხადება გააკეთა. პოლიტიკოსმა ეს გადაწყვეტილება ქვეყანაში პოლიტიკური კრიზისის ფონზე მიიღო და აღნიშნა, რომ თავის გუნდთან ვერ მიაღწია თანხმობას „ერთიანი ნაციონალური მოძრაობის“ თავმჯდომარის ნიკა მელიას დაკავებასთან დაკავშირებულ საკითხზე.
