05:39 04 დეკემბერი 2020
პირდაპირი ეთერი
  • EUR4.0107
  • 100 RUB4.4084
  • USD3.3119
პოლიტიკა
მოკლე ბმულის მიღება
საქართველოს პარლამენტი (198)
135 0 0

ცვლილებების მიღების შემთხვევაში, ნარკოლოგიურ შემოწმებას გაივლიან მხოლოდ კენჭისყრის შედეგად არჩეული დეპუტატობის კანდიატები, და არა ყველა კანდიდატი, რომელიც საარჩევნო კომისიებში რეგისტრაციას გადის

თბილისი, 12 სექტემბერი - Sputnik. 2020 წლის საპარლამენტო არჩევნებში პარლამენტის წევრობის კანდიდატად რეგისტრაციისთვის პირს ნარკოლოგიური შემოწმების შესახებ ცნობის წარდგენა აღარ მოუწევს.

„საარჩევნო კოდექსში“ შედის შესაბამისი ცვლილებები, რომელთა ინიცირება 14 სექტემბრის ბიუროს სხდომაზე მოხდება.

კანონპროექტის ინიციატორები უმრავლესობის წევრები გურამ მაჭარაშვილი და რატი იონათამიშვილი არიან.

მოქმედი კანონმდებლობა აღნიშნულ ვალდებულებას ითვალისწინებდა, ხოლო თუ პირი ამ მუხლის ამოქმედებამდე პარლამენტის წევრობის კანდიდატად რეგისტრაციაში არ გატარდა მხოლოდ ნარკოლოგიური შემოწმების შესახებ ცნობის წარუდგენლობის გამო, ცესკოს თავმჯდომარე ვალდებულია, ამ მუხლის ამოქმედებიდან სამ დღეში გაატაროს იგი საარჩევნო რეგისტრაციაში.

თუმცაღა, პარლამენტის წევრად უკვე არჩეული პირი ვალდებულია კენჭისყრის დღიდან 7 დღის ვადაში გაიაროს ნარკოლოგიური შემოწმება და შესაბამისი ცნობა ამავე ვადაში წარუდგინოს იმ საარჩევნო კომისიას, სადაც საარჩევნო რეგისტრაციაში გატარდა.

აღნიშნულ ცვლილებას ოპოზიციური ფრაქცია „ნაციონალური მოძრაობის" თავმჯდომარე რომან გოცირიძე გამოეხმაურა.

„პრობლემის არსი იმაში მდგომარეობდა, რომ საარჩევნო კოდექსში შეტანილი ცვლილებების შემდეგ, ნარკოლოგიური შემოწმება ევალებოდა ყველას, ვინც იქნებოდა საარჩევნო სიაში და არა მხოლოდ მათ, ვინც გახდებოდა დეპუტატები. 9 ათას ადამიანს უნდა ჩაებარებინა შარდი, მაშინ, როცა მხოლოდ 150 გახდებოდა აქედან პარლამენტის წევრი. ეს აბსურდია, რა თქმა უნდა. ახლა პარლამენტში დარეგისტრირდა ცვლილებები საარჩევნო კოდექსში, შეცვლიან ამ უაზრო მოთხოვნას“, - განაცხადა მან.

საქართველოს პარლამენტისა და აჭარის უმაღლესი საბჭოს არჩევნები 31 ოქტომბერს არის დანიშნული. შესაბამის განკარგულებას პრეზიდენტმა სალომე ზურაბიშვილმა ხელი უკვე მოაწერა. ამჯერად საპარლამენტო არჩევნები ახალი სისტემით გაიმართება. პარლამენტის 150 დეპუტატს შერეული სისტემით აირჩევენ: 120-ს პარტიული სიებით, 30-ს კი ერთმანდატიან მაჟორიტარულ ოლქებში გამართული კენჭისყრის შედეგებით.

თემები:
საქართველოს პარლამენტი (198)

მთავარი თემები