თბილისი, 20 აგვისტო – Sputnik. ყოფილი მმართველი პარტია „ერთიანი ნაციონალური მოძრაობა“ კვლავ სკანდალის ცენტრშია, ამჯერად ვნებათაღელვა იყო ისნის მაჟორიტარული ოლქის გარშემო, სადაც ოპოზიციამ ერთიან კანდიდატად პარტია „აღმაშენებლის სტრატეგიის“ ლიდერი გიორგი ვაშაძე წარადგინა.
„თავისუფალი დემოკრატები“ არჩევნების წინ მოულოდნელად გაიყო >>
გაერთიანებული ოპოზიციის შეთანხმების მიხედვით, ვაშაძეს მხარი უნდა დაუჭიროს ყველა პარტიამ, თუმცა „ნაცმოძრაობის“ წარმომადგენლებმა ყველასათვის მოულოდნელად განაცხადეს ამ შეთანხმების შესაძლო დარღვევის შესახებ.
„გიორგი ვაშაძემ და მისმა გუნდმა ოპოზიციის ერთობა დაარღვიეს იმის გამო, რომ პრემიერ-მინისტრობის კანდიდატად მისი დასახელება სავალდებულო ყოფილიყო. ისნის მაჟორიტარობის კანდიდატთან დაკავშირებით, პარტია შესაბამის ოფიციალურ განცხადებას გააკეთებს და მასში ყველა არგუმენტი იქნება დასახელებული“, - განაცხადა „ნაცმოძრაობის“ ერთ-ერთმა ლიდერმა ლევან ბეჟაშვილმა.
მისი თქმით, საბოლოო გადაწყვეტილებას პარტია მიიღებს კონსულტაციების შემდეგ, მაგრამ სავსებით შესაძლებელია, რომ ის ისანში თავის კანდიდატს დააყენებს.
თავად ვაშაძე „ნაცმოძრაობის“ ბრალდებებს კატეგორიულად უარყოფს.
„მე ვარ ადამიანი, რომელიც მთელი ცხოვრება იცავს ყველა პირობას და შეთანხმებას, რაც კი ოდესმე გაგვიკეთებია, იგივე მოლოდინი მაქვს „ნაციონალური მოძრაობის“ მხრიდან. მათ უნდა გადაწყვიტონ, იცავენ შეთანხმებას, თუ არა. ისინი თუ დაარღვევენ ამ შეთანხმებას, ეს ძალიან ცუდი იქნება, მაგრამ თუ დამიყენებენ ისანში მაჟორიტარ კანდიდატს, მე დავამარცხებ მათ მიერ დაყენებულ კანდიდატს და შემდეგ აუცილებლად დავამარცხებ „ქართული ოცნების“ კანდიდატსაც, რომელიც არის ჩვენი მთავარი სამიზნე“, – განაცხადა ვაშაძემ.
გიორგი ვაშაძე
ქარიზმატულმა გიორგი ვაშაძემ საკუთარი თამაში არც ისე დიდი ხნის წინ წამოიწყო, ამან კი „ნაციონალურ მოძრაობაში“ უკმაყოფილება გამოიწვია.
დღეისათვის ვაშაძე პოლიტიკოსებს შორის ეკრანებზე ყველაზე ხშირად ჩნდება და აგრესიული სარეკლამო კამპანიით გამოირჩევა.
ვაშაძეს და „ნაცმოძრაობას“ თანამშრომლობის ხანგრძლივი პერიოდი აკავშირებს. სააკაშვილის ხელისუფლების პერიოდში ის იყო მისი აქტიური მხარდამჭერი და იუსტიციის მინისტრის მოადგილე. 2016 წელს მან დატოვა „ნაცმოძრაობა“ და დააარსა თავისი პარტია „ახალი საქართველო“. უკვე 2018 წელს პარტია „ნაცმოძრაობასთან“ კოალიციაში შევიდა და გასული წლის ნოემბერში პრეზიდენტის არჩევნებზე ვაშაძე იყო კოალიციის კანდიდატის, გრიგოლ ვაშაძის საარჩევნო შტაბის უფროსი.
