თბილისი, 27 მაისი – Sputnik. ახალი კორონავირუსის პანდემია საქართველოს ხელისუფლებისთვის ყველაზე დიდი გამოწვევა გახდა, თუმცა ამ ეტაპზე ვითარება სრულად ექვემდებარება კონტროლს, განაცხადა პრემიერ-მინისტრმა გიორგი გახარიამ პარლამენტში სიტყვით გამოსვლისას.
ამ წუთებში საქართველოს მთავრობის მეთაური დეპუტატებს საგანგებო მდგომარეობის პერიოდში გაწეული საქმიანობის შესახებ ანგარიშს აბარებს. ქვეყანის მთელ ტერიტორიაზე საგანგებო მდგომარეობა 21 მარტს გამოცხადდა.
„ჩვენ დღეს ოფიციალურად შეგვიძლია ვთქვათ, რომ ახალი „ქეისები“ (შემთხვევები – რედ.) ძირითადად ფიქსირდება მთავრობის მიერ კონტროლირებად ზონებში – ეს გახლავთ საკარანტინო ზონები, ცნობილი კლასტერები. შესაბამისად, შეიძლება ითქვას, რომ ემიდემიის გავრცელება და მისი სისწრაფე სრულად ექვემდებარება კონტროლს“, – განაცხადა გახარიამ.
ამასთან, მან აღნიშნა, რომ ევროპის მასშტაბით საქართველოში სიკვდილიანობის ყველაზე დაბალი მაჩვენებელია.
„დღეს ინფექციის გავრცელებით ქვეყანა 143-ე ადგილზეა. ეს არ არის სიამაყის საბაბი და მხოლოდ მთავრობის დამსახურება, არამედ ესაა ბიზნესის და, პირველ რიგში, საზოგადოების დამსახურება. ეს ჩვენ გვაძლევს პანდემიის გაკონტროლების და ეკონომიკის ეტაპობრივად გახსნის შესაძლებლობას“, – განაცხადა გახარიამ.
საქართველოში კორონავირუსის გამოვლენის პირველი შემთხვევა 26 თებერვალს დაფიქსირდა. 21 მარტს ქვეყნის მთელ ტერიტორიაზე საგანგებო მდგომარეობა გამოცხადდა, რომელიც 23 მაისამდე გაგრძელდა. ამ ეტაპზე საქართველოში შეზღუდვების ეტაპობრივი მოხსნის პროცესი მიმდინარეობს.
