თბილისი, 12 დეკემბერი — Sputnik. ამ დროისათვის საქართველოს პარლამენტთან მიმდინარე აქციის 12 მონაწილეა დაკავებული, იუწყება ტელეკომპანია „იმედი".
დაკავებულებს პოლიციისადმი დაუმორჩილებლობა და წვრილმანი ხულიგნობა ედებათ ბრალად.
პარტია „ახალი საქართველოს" წარმომადგენლების ინფორმაციით, დაკავებულთა შორისაა პარტიის ლიდერი გიორგი ვაშაძე და ოპოზიციის სხვა წარმომადგენლები – გიორგი თევდორაძე, ბესო გაზდელიანი, გურამ ჩალაგაშვილი, ზურაბ კოსტავა, დავით კაკაურიძე, კახაბერ მაჩიტიძე და სხვები.
ოპოზიციამ და ახალგაზრდული სამოქალაქო მოძრაობის აქტივისტებმა საქართველოს პარლამენტის პიკეტირება დილიდან დაიწყეს, ისინი უზენაეს სასამართლოში არაკეთილსინდისიერი მოსამართლეების დანიშვნას აპროტესტებენ. აქცია სახელწოდებით „არა არაკეთილსინდისიერ მოსამართლეებს" ხმაურის ფონზე მიმდინარეობს, პერიოდულად პოლიციასთან შეხლა-შემოხლა ხდება.
