თბილისი, 22 აპრილი — Sputnik. საქართველოს პრემიერ-მინისტრმა მამუკა ბახტაძემ ვლადიმირ ზელენსკის უკრაინის საპრეზიდენტო არჩევნებში გამარჯვება მიულოცა.
უკრაინის ცესკოს მონაცემებით, ოქმების 89,41%-ის დამუშავების შემდეგ ზელენსკი იღებს ამომრჩეველთა ხმების 73,19%-ს, ხოლო სახელმწიფოს მოქმედი მეთაური პეტრო პოროშენკო – 24,48%-ს.
„ვულოცავ ახლად არჩეულ პრეზიდენტს ვლადიმირ ზელენსკის. საქართველო მხარს უჭერს უკრაინის მშვიდობიან და დემოკრატიულ გადაწყვეტილებას", – დაწერა საქართველოს პრემიერმა Twitter-ში.
საპრეზიდენტო არჩევნების მეორე ტური კვირას გაიმართა. ამომრჩევლების გამოცხადება 62,07%-ს შეადგენდა.
უკრაინის ცესკოს თავმჯდომარის მოადგილის ევგენი რადჩენკოს განცხადებით, კენჭისყრის ოფიციალური შედეგები, საორიენტაციოდ, 30 აპრილს გამოცხადდება.
