თბილისი, 12 დეკემბერი — Sputnik. ოპოზიციური გაერთიანება „ძალა ერთობაშია", რომელშიც შედის „ერთიანი ნაციონალური მოძრაობა", 16 დეკემბერს საპროტესტო აქციის გამართვას გეგმავს თელავში, სადაც ამ დღეს ახლად არჩეული პრეზიდენტის სალომე ზურაბიშვილის ინაუგურაცია უნდა გაიმართოს.
„ძალა ერთობაშია" უარს ამბობს საპრეზიდენტო არჩევნების შედეგების აღიარებაზე. ოპოზიციონერები ხელისუფლებას არჩევნების გაყალბებაში ადანაშაულებენ.
„რადგან ხელისუფლებამ ყურად არ იღო ჩვენი კომპრომისული შეთავაზებები, 16 დეკემბერს თელავში ჩვენ ჩავატარებთ მშვიდობიან აქციას, რომელიც მთლიანად იქნება ჩვენი კონსტიტუციის, კანონმდებლობისა და ადამიანის უფლებების საყოველთაო დეკლარაციის ფარგლებში. ეს იქნება მშვიდობიანი მანიფესტაცია, რომელშიც მონაწილეობას მიიღებს გაერთიანებული ოპოზიციის ყველა პარტია", – განაცხადა „ნაციონალური მოძრაობის" წევრმა, პრეზიდენტობის კანდიდატმა გრიგოლ ვაშაძემ ბრიფინგზე.
მისი თქმით, თელავის გარდა აქციები ჩატარდება თბილისში და ზოგიერთ სხვა ქალაქში. ყველაზე მასშტაბური აქციის ჩატარება კი თელავში იგეგმება.
საპრეზიდენტო არჩევნების მეორე ტურში, 28 ნოემბერს ზურაბიშვილი და ვაშაძე იბრძოდნენ. ზურაბიშვილმა ხმათა 59,5%-ზე მეტი დააგროვა.
ზურაბიშვილის ინაუგურაცია თელავში ჩატარდება, სტუმრების მიღება კი, შესაძლოა, წინანდალში გაიმართოს. მანამდე თბილისში ზურაბიშვილი ილია ჭავჭავაძის საფლავსა და გმირთა მემორიალს გვირგვინებით შეამკობს.
