თბილისი, 27 აგვისტო — Sputnik. თეთრიწყაროს მუნიციპალიტეტში განსაკუთრებით დიდი ოდენობით ნარკოტიკული საშუალების უკანონო შეძენა-შენახვის ბრალდებით 56 წლის მამაკაცი დააკავეს, ნათქვამია შსს-ს მიერ გავრცელებულ განცხადებაში.
სამართალდამცველებმა მამაკაცი თეთრიწყაროს მუნიციპალიტეტის ტერიტორიაზე, მარნეული–თბილისის საავტომობილო გზაზე მიკროავტობუსით გადაადგილების დროს გააჩერეს. მიკროავტობუსის და საცხოვრებელი სახლის ჩხრეკის შედეგად პოლიციამ ნივთმტკიცების სახით ჰეროინის შემცველი ორ კილოგრამამდე ნარკოტიკული საშუალება ამოიღო.
გამოძიება დაწყებულია სსკ-ის 260-ე მუხლის მეექვსე ნაწილით, რაც განსაკუთრებით დიდი ოდენობით ნარკოტიკული საშუალების უკანონო შეძენა-შენახვას გულისხმობს. დანაშაული 8-დან 20 წლამდე ან უვადო თავისუფლების აღკვეთას ითვალისწინებს.