თბილისი, 8 ივლისი — Sputnik. მცხეთაში ახალგაზრდა მამაკაცმა მამა და ბაბუა მოკლა, იუწყება საზოგადოებრივი მაუწყებლის „პირველ არხი“.
მეზობლების თქმით, მამაკაცმა მკვლელობა ორი დღის წინ, გვიან ღამით ჩაიდინა.
„ჩემი ინფორმაციით, მკვლელობა, სავარაუდოდ, გამთენიისას, 04:00 საათზე მოხდა. მამაკაცმა მძინარე მამა და ბაბუა მოკლა. მანამდე კონფლიქტი ჰქონდათ. ეს ბიჭი ციხიდან ოთხი დღის წინ გამოვიდა. 15 წელი მკვლელობისთვის იჯდა. ახლ დაახლოებით 30 წლისაა", – განაცხადა მეზობელმა მარიამ ტატიშვილმა.
შემთხვევის ადგილზე პოლიცია და ექსპერტ-კრიმინალისტები იყვნენ მობილიზებული. გარდაცვლილები პროზექტურაში ექსპერტიზაზე გადაასვენეს.
მომხდარ ფაქტთან დაკავშირებით გამოძიება „დამამძიმებელ გარემოებაში ორი ან მეტი პირის განზრახ მკვლელობის" მუხლით დაიწყო, რაც 16-დან 20 წლამდე ვადით ან უვადო პატიმრობას გულისხმობს.
პოლიცია მკვლელობაში ეჭვმიტანილს ეძებს, რომელიც ამჟამად გაქცეულია.
