თბილისი, 10 მარტი — Sputnik. ქუთაისში დაკარგული ნიდერლანდების 23 წლის მოქალაქის სიიმ ვიგერის სამძებრო ოპერაციაში საგანგებო სიტუაციების მართვის სამსახურის სწრაფი რეაგირების ჯგუფიდან მყვინთავები ჩაერთნენ, აცნობეს „Sputnik–საქართველოს" შინაგან საქმეთა სამინისტროში.
ვიდეო-სათვალთვალო კამერებმა 23 წლის ახალგაზრდა ბოლოს მდინარე რიონზე, წითელ ხიდთან დააფიქსირეს.
მამაკაცი 7 მარტს გაუჩინარდა. მისი ძმის სიტყვებით, სიიმი მეგობართან ერთად რესტორან „ბარაქაში" იმყოფებოდა. ისინი დაწესებულებიდან ერთად გამოვიდნენ, შემდეგ გაემართნენ ქუთაისის McDonald's-ის მიმართულებით და სწორედ ამ დროს დაკარგეს ერთმანეთი. მეგობარი სიიმს სასტუმრო Star-ის ნომერში ელოდებოდა.
სიიმ ვიგერი სატელეფონო ზარებს არ პასუხობს და 7 მარტის 23:30 საათიდან კავშირზე არ გამოსულა.
ამასობაში Facebook-ზე კიდევ ერთი ტურისტის დაკარგვის შესახებ გავრცელდა ინფორმაცია.
უკრაინელ 22 წლის დენის დომბროვსკის დედა ელენა მატვიიუკი ეძებს.
მისი სიტყვებით, ახალგაზრდა მამაკაცი თბილისში 4 მარტს დაიკარგა.
„მან გადმორეკა და თქვა, რომ სასტუმროშია და დასვენებას აპირებს. მას შემდეგ კავშირი არაა", – დაწერა ქალმა.
ამ ფაქტთან დაკავშირებით შსს-ში განაცხადეს, რომ მათთან აღნიშნული პიროვნების დაკარგვის შესახებ ინფორმაცია არ შესულა.
