თბილისი, 29 იანვარი — Sputnik. სამართალდამცველებმა ქალაქ ოზურგეთში ყაჩაღობის ბრალდებით წარსულში ნასამართლევი 24 წლის მამაკაცი დააკავეს, ნათქვამია შსს-ს მიერ გავრცელებულ განცხადებაში.
გამოძიებით დადგინდა, რომ მიმდინარე წლის 14 იანვარს ბრალდებული ოზურგეთში მდებარე ერთ-ერთ სუპერმარკეტს თავს დაესხა, ცივი იარაღის მუქარით მოლარეს ფული გასტაცა და შემთხვევის ადგილიდან მიიმალა.
პოლიციამ ეჭვმიტანილი მომხდარიდან რამდენიმე დღეში ოზურგეთში დააკავა სასამართლოს განჩინების საფუძველზე. სამართალდამცველებმა დანაშაულის ჩადენის იარაღი – დანა ნივთმტკიცებად ამოიღეს.
აღნიშნულ ფაქტთან დაკავშირებით გამოძიება სსკ-ის 179-ე მუხლის პირველი ნაწილით მიმდინარეობს, რაც სასჯელის სახით ხუთიდან შვიდ წლამდე პატიმრობას ითვალისწინებს.
