თბილისი, 14 იანვარი — Sputnik. გამომძიებლები არ გამორიცხავენ, რომ დედოფლისწყაროში მთავარი ნაძვის ხის დაწვაში ადგილობრივი სკოლის მოსწავლე გოგონა მონაწილეობდა, წერს გაზეთი „რეზონანსი".
დედოფლისწყაროს ცენტრალურ მოედანზე მთავარი საახალწლო ნაძვის ხე 1-2 იანვრის ღამეს დაიწვა, თუმცა მიზეზი უცნობია. გამოძიება მიმდინარეობს ნივთის დაზიანების ან განადგურების მუხლით. ერთ-ერთი ვერსიით, ეს სკოლის მოსწავლე გოგონამ ჩაიდინა.
ნაძვის ხის დაწვით მიყენებულმა ზარალმა 31 ათასი ლარი შეადგინა. გამოძიებას ბრალი ჯერ არავისთვის წაუყენებია.
მთავარი საახალწლო ნაძვის ხე დედოფლისწყაროს რაიონულმა ადმინისტრაციამ 2012 წელს შეიძინა. ეს პირველი შემთხვევა არაა, როცა ნაძვის ხეს „ტრაგიკული ბედი" ეწია – აქვე 2017 წელს ის ძლიერი ქარის გამო გადავარდა.
