თბილისი, 10 იანვარი — Sputnik. რუსთავის საქალაქო სასამართლომ 13 წლით პატიმრობა შეუფარდა ირანის მოქალაქეს, რომელსაც განსაკუთრებით დიდი ოდენობით ნარკოტიკული საშუალების უკანონო შეძენა-შენახვა ედებოდა ბრალად, ნათქვამია საქართველოს პროკურატურის განცხადებაში.
სასამართლო პროცესზე წარდგენილი მტკიცებულებებით დამტკიცდა, რომ ბრალდებული უკანონოდ შეძენილ, 1 კგ-ზე მეტი ოდენობის ნარკოტიკულ ნივთიერება ჰეროინს ინახავდა.
ირანის მოქალაქე საქართველოში 2019 წლის 4 სექტემბერს დააკავეს. მას ბრალი სსკ-ის 260-ე მუხლის მეექვსე ნაწილის „ა" ქვეპუნქტით წარედგინა (განსაკუთრებით დიდი ოდენობის ნარკოტიკული საშუალების უკანონო შეძენა-შენახვა), რაც ითვალისწინებს 8-დან 20 წლამდე ვადით პატიმრობას.
რუსთავის საქალაქო სასამართლომ ბრალდებულს 13 წლით პატიმრობა შეუფარდა.
შსს-ს მონაცემებით, საქართველოში ნარკოტიკები რამდენიმე გზით ხვდება. მძიმე ნარკოტიკები შემოდის აღმოსავლეთიდან, „ფონიჭალის არხის" გავლით. მეორე გზაა ინტერნეტი, მესამე – ევროპა, საიდანაც „კლუბური“ ნარკოტიკები შემოდის.