თბილისი, 10 სექტემბერი — Sputnik. თბილისში, თარხნიშვილის ქუჩაზე დაჭრილი ვახტანგ სუთიძის მდგომარეობა გაუმჯობესდა. მოდის ექსპერტის დალი ჩიტალაძის ვაჟს სამედიცინო დაწესებულებაში ოპერაცია ჩაუტარდა და მის სიცოცხლეს საფრთხე არ ემუქრება.
დაჭრილი მეგობრებს და ახლობლებს „ფეისბუქით“ მიმართავს და მადლობას უხდის გულშემატკივრობისთვის:
„ყველას უღრმესი მადლობა ყურადღებისათვის და სიყვარულისათვის. იმედი მაქვს, ღვთის წყალობით, მალე გამოვჯანმრთელდები. დიდება უფალს და მადლობა უფალს ყველაფრისათვის!“ – დაწერა ვახტანგ სუთიძემ „ფეისბუქის“ პირად გვერდზე.
39 წლის სუთიძე თარხნიშვილის ქუჩაზე კვირას დაჭრეს. როგორც დაჭრილის დედა დალი ჩიტალაძე ჰყვება, მის ვაჟს უცხო მამაკაცი
იმ დროს დაესხა თავს, როდესაც ის ეკლესიიდან სახლში ბრუნდებოდა.
„გიჟები დადიან ქალაქში და ერთ-ერთი მათგანი ჩემს შვილს დაესხა თავს, ის მას მხოლოდ ეკლესიაში წირვებზე ჰყავს ნანახი. როდესაც ჩემი შვილი დილით ტაძრიდან ბრუნდებოდა, მას გამოჰყვა ეს მამაკაცი და ისე, რომ არაფერი უთქვამს, სადარბაზოში შემოყვა, უკან მიეპარა და დანა დაარტყა“, – განაცხადა ჩიტალაძემ.
სამართალდამცველებმა ორშაბათს დააკავეს ბრალდებული – 1969 წელს დაბადებული, წარსულში ნასამართლევი და ამჟამად პირობითი მსჯავრის ქვეშ მყოფი მამაკაცი დ.ს.
გამოძიება სისხლის სამართლის კოდექსის 120-ე მუხლით მიმდინარეობს, რაც ჯანმრთელობის განზრახ მძიმე დაზიანებას გულისხმობს.