თბილისი, 27 ივნისი – Sputnik. ყინწვისში უბედურ შემთხვევას თბილისის მე-14 საჯარო სკოლის მასწავლებელი ემსხვერპლა, იუწყება ტელეკომპანია Imedi.
უბედური შემთხვევა 23 ივნისს მოხდა.
გავრცელებული ინფორმაციით, მანანა ჩოხელი მოსწავლეებთან ერთად ექსკურსიაზე იმყოფებოდა. თვითმხილველების თქმით, მასწავლებელმა ჯგუფური ფოტოს გადაღების შემდეგ წონასწორობა დაკარგა, 25 მეტრი სიმაღლიდან გადავარდა და შემთხვევის ადგილზე გარდაიცვალა.
მომხდარ ფაქტზე გამოძიება სისხლის სამართლის კოდექსის 115-ე მუხლით დაიწყო, რაც თვითმკვლელობამდე მიყვანას გულისხმობს.
საქართველოში ექსკურსიების თემა აქტუალური მაისის ბოლოს მომხდარი ორი უბედური შემთხვევის შემდეგ გახდა. 26 მაისს სასკოლო ექსკურსიის დროს უბედური შემთხვევა მოხდა ლაგოდეხის ნაკრძალში – 16 წლის მოზარდი მდინარე ნინოსხევში ჩავარდა. მისი ცხედარი მაშველებმა მეორე დღეს იპოვეს. ასევე ექსკურსიის დროს უფლისციხის ნაკრძალში შვიდი წლის ბავშვი სიმაღლიდან გადმოვარდა. მან მრავლობითი ტრავმა მიიღო.
