თბილისი, 20 ივნისი — Sputnik. საქართველოს შსს-მ თბილისის მეტროპოლიტენის სადგურ "რუსთაველზე" მომხდარი ჩხუბის გამო სისხლის სამართლის საქმე აღძრა, ნათქვამია უწყების განცხადებაში.
საპატრიარქო: სასულიერო პირებისა და მრევლის აგრესიულ განცხადებებს ვემიჯნებით>>
პოლიციამ უკვე დაკითხა „პირველი არხის“ ჟურნალისტი, რომელიც შემთხვევის ადგილზე აღმოჩნდა და მობილური ტელეფონის ვიდეოკამერით შეძლებისდაგვარად, მიმდინარე მოვლენები ჩაიწერა.
მომხდარის რამდენიმე ვერსია არსებობს. ერთ-ერთი ვერსიით, ორი ახალგაზრდა, სავარაუდოდ, მუსიკოსები, აგრესიის ობიექტი გარეგნობის გამო გახდა. კადრების მიხედვით, ერთ-ერთი დრედებს ატარებდა.
„საყურიანი ბიჭები ქართველობას არ შეეფერება", - ასე უყვიროდა გააფთრებული მამაკაცი ბიჭებს.
მეორე ვერსიით, კონფლიქტი იმის გამო დაიწყო, რომ ახალგაზრდებმა ერთ-ერთი ვაგონის კარები დააკავეს. ამან მგზავრების გაღიზიანება გამოიწვია. შემდეგ სიტყვიერი შელაპარაკება ჩხუბში გადაიზარდა.
რა მოხდა სინამდვილეში, ამას შსს არკვევს. სისხლის სამართლის საქმე აღძრულია ორი მუხლით – რასობრივი, რელიგიური, ეროვნული ან ეთნიკური შეუწყნარებლობის ნიადაგზე ჩადენილი ძალადობისა და ხულიგონობის მუხლებით. დანაშაული ექვს წლამდე პატიმრობას ითვალისწინებს.
