თბილისი, 7 ივნისი — Sputnik. შსს იძიებს 80 წელს გადაცილებული ცოლ-ქმრის მკვლელობას, რომლის დეტალებზე გარდაცვლილთა ნათესავებმა მედია-საშუალებებს უამბეს.
შურისძიების გამო მოკლული პენსიონერი - ბრალდებული დაკავებულია >>
მკვლელობა გარდაბანში გასულ ღამეს მოხდა.
„დაღუპულები არიან ცოლ-ქმარი, რომლებიც 85 წლამდე ასაკის იყვნენ. მკვლელობის დროს ცეცხლსასროლი იარაღი არ გამოუყენებიათ. გარდაცვალების ზუსტ მიზეზს სამედიცინო ექსპერტიზა დაადგენს“, - განუცხადა „Sputnik-საქართველოს“ სამინისტროს პრესსამსახურის თანამშრომელმა.
მოკლულების მეზობლებმა განაცხადეს, რომ მამაკაცი საპირფარეშოშია მოკლული, მისი მეუღლე კი სააბაზანოში. მეზობლების ვარაუდით, დანაშაული შურისძიების მიზნით არის ჩადენილი, რადგან კარზე დატოვებულია წარწერა - „ედიკ, გელოდებით“. ამასთან, ძვირადღირებული ნივთები ხელუხლებელი დარჩა, იუწყება ტელეარხი Rustavi2.
ედიკი - გარდაცვლილი პენსიონრების ვაჟია.
მოკლული მამაკაცის დამ განაცხადა, რომ მისი ძმისშვილები მოსკოვში ცხოვრობენ. ის ვარაუდობს, რომ ცხედრები დასახიჩრებულია და სწორედ ამიტომ არ აჩვენეს.
სისხლის სამართლის საქმე აღძრულია სსკ-ის 109-ე მუხლით - „განზრახ მკვლელობა დამამძიმებელ გარემოებაში“, რაც სასჯელის სახით 11-დან 20 წლამდე ან უვადო თავისუფლების აღკვეთას გულისხმობს, დამამძიმებელი გარემოების სახის მიხედვით.
