თბილისი, 7 ივნისი — Sputnik. ბათუმში, 18 წლის თამარ მოდებაძემ სიცოცხლე თვითმკვლელობით დაასრულა. Imedinews-ის ინფორმაციით, მშობლები შვილის თვითმკვლელობამდე მიყვანაში მის შეყვარებულს ადანაშაულებენ და ახალგაზრდის დაკავებას ითხოვენ, წინააღმდეგ შემთხვევაში პროტესტის რადიკალურ ფორმას მიმართავენ და მიცვალებულს არ დაკრძალავენ.
18 წლის თამარ მოდებაძემ თავი ორი დღის წინ ჩამოიხრჩო. საქმეს შინაგან საქმეთა სამინისტრო სისხლის სამართლის კოდექსის 115-ე მუხლით იძიებს, რაც თვითმკვლელობამდე მიყვანას გულისხმობს. ამ ეტაპზე გამოკითხვები მიმდინარეობს.
მშობლების განცხადებით, გარდაცვალებამდე გოგომ დატოვა წარწერა- „მკვლელი ნიკა“, რომელიც შეყვარებულის მიმართ იყო დაწერილი. მშობლები ვარაუდობენ, რომ თვითმკვლელობის მიზეზი კონფლიქტი გახდა, რომელიც შეყვარებულებს ერთი დღით ადრე მოუვიდათ.