თბილისი, 15 ივლისი — Sputnik. სამეგრელოში ყაჩაღობის ბრალდებით სამართალდამცავებმა ორი მამაკაცი დააკავეს, იუწყება შინაგან საქმეთა სამინსიტროს პრეს-სამსახური.
უწყების ცნობით, დაკავებულები არიან 33 წლის ა. ჯ. და 37 წლის პ. ჯ.
„გამოძიებით დადგინდა, რომ პისტოლეტით და გადაჭრილი ორლულიანი სანადირო თოფით შეიარაღებული ბრალდებულები ხობის რაიონის სოფელ ხამისკურში, თავს დაესხნენ სატვირთო ავტომობილს, მასში მყოფ 2 პირს ფიზიკური დაზიანებები მიაყენეს და თანხა გაიტაცეს“, — აღნიშნულია უწყების ვებ-გვერდზე.
სამართალდამცველებმა გატაცებული თანხის ნაწილი ნივთმტკიცების სახით ამოიღეს. ასევე, ამოღებულია დანაშაულის ჩადენის იარაღები.
გამოძიება ჯგუფურად ჩადენილი ყაჩაღობის ფაქტზე მიმდინარეობს, საქართველოს სსკ-ს 179-ე მუხლის მე-2 ნაწილის „ბ“ პუნქტით. ჩადენილი დანაშაული 6-დან 9 წლამდე ვადით თავისუფლების აღკვეთას ითვალისწინებს.
