თბილისი, 21 ოქტომბერი — Sputnik. საქართველოს შსს-მ ოპოზიციური პარტია „ევროპული საქართველო — დემოკრატიული მოძრაობის“ მხარდამჭერის მიერ გაკეთებული განცხადების საფუძველზე, რომ ის მარნეულის რაიონის სოფელ ქვემო სარალის №58 საარჩევნო უბანზე ფიზიკური ანგარიშსწორების მსხვერპლი გახდა, სისხლის სამართლის საქმე აღძრა, იუწყება საინფორმაციო სააგენტო Новости-Грузия სამინისტროზე დაყრდნობით.
ინფორმაცია აღნიშნულ ინციდენტთან დაკავშირებით საქართველოს პარლამენტის დეპუტატმა „ევროპული საქართველოდან“ ირმა ნადირაშვილმა ბრიფინგზე გაავრცელა. ნადირაშვილის სიტყვებით, მათი პარტიის მომხრე მუჰამედ ჰუსეინოვს მმართველი პარტია „ქართული ოცნება — დემოკრატიული საქართველოს“ მაჟორიტარი დეპუტატობის კანდიდატი მირქაზუმ იაგუბოვი ფიზიკურად გაუსწორდა.
სისხლის სამართლის საქმე „ძალადობის“ მუხლითაა აღძრული, რაც ჯარიმას, საზოგადოებისთვის სასარგებლო შრომას ვადით 120-დან 180-მდე საათით, ან ერთ წლამდე ვადით თავისუფლების აღკვეთას ითვალისწინებს.
საქართველოს მოქალაქეები შაბათს ქალაქებისა და რაიონების 64 მერსა და 64 საკრებულოს დეპუტატებს ირჩევენ. თვითმმართველობის არჩევნებში 22 პარტია, 5 საარჩევნო ბლოკი და ასევე დამოუკიდებელი კანდიდატები მონაწილეობენ.